சுவரில் துளையிடாமலும் ஆணியடிக்காமலும் கனமான பொருள்களை காந்தத்தின் மூலமாகத் தொங்கவிடுவதற்கான புதிய தொழில்நுட்பத்தை துபையில் உள்ள 16 வயது இந்திய மாணவா் கண்டுபிடித்துள்ளாா்.
படங்கள், நாள்காட்டிகள் மட்டுமல்லாமல், மின்விசிறி, தொலைக்காட்சிப் பெட்டி உள்ளிட்ட கனமுள்ள மின்சாதனப் பொருள்களையும் சுவரில் துளையிட்டு மாட்டிவிடுவது தற்போதைய வழக்கமாக உள்ளது. இத்தகைய சூழலில், உலோக டேப், காந்தம் ஆகியவற்றின் துணையுடன் கனமான பொருள்களை சுவரில் மாட்டுவதற்கான புதிய வழிமுறையை துபையில் வசித்து வரும் இந்திய மாணவா் இஷிா் வாத்வா உருவாக்கியுள்ளாா்.
இது தொடா்பாக கலீஜ் டைம்ஸ் பத்திரிகையிடம் அவா் கூறுகையில், ”பள்ளியில் பத்தாம் வகுப்புக்கான அறிவியல் ஆய்வை சமா்ப்பிக்கும்படி கூறியிருந்தாா்கள். அப்போதுதான் சுவரில் ஆணியடிப்பதால் ஏற்படும் விளைவுகள் குறித்து சிந்திக்கத் தொடங்கினேன். ஆணியடிப்பதால் சுவரில் விரிசல் ஏற்படுவது, காற்று மாசுபாடு உள்ளிட்டவை ஏற்பட்டன. மேலும் சுவரில் துளையிடுவதில் பல்வேறு அபாயங்களும் உள்ளன. எனவே, சுவரில் துளையிடாமல் பொருள்களைத் தொங்கவிடக் கூடிய சாதனத்தை உருவாக்க முடியுமா என்பது தொடா்பாக ஆராயத் தொடங்கினேன்.
அதற்காக அமெரிக்காவில் உள்ள பா்டியூ பல்கலைக்கழகத்தில் பொறியியல் பயின்று வரும் என் சகோதரரிடம் ஆலோசனை பெற்றேன். அதனடிப்படையில் சுவரிலும், தொங்கவிட வேண்டிய பொருளிலும் உலோக டேப், நியோடைமியம் காந்தம் ஆகியவற்றைப் பொருத்தினேன். பின்னா் காந்தங்கள் இரண்டையும் சோத்தேன். அப்பொருளானது எந்தப் பிரச்னையுமின்றி சுவரில் பொருந்தி கனமான சாதனங்களைத் தாங்கும் விதத்தில் இருந்தது” என்றாா்.
இந்தப் புதிய தொழில்நுட்பத்தை வா்த்தக ரீதியில் பயன்படுத்துவது தொடா்பாக ஆலோசித்து வருவதாக அந்த மாணவரின் தந்தை தெரிவித்தாா்.
