இதற்காக துபாய் முதலீட்டு பூங்கா பகுதியில் 1,080 ஏக்கர் பரப்பளவில் பிரமாண்டமாக பல்வேறு நாடுகளின் அரங்கங்கள் அமைக்கப்பட்டு வருகின்றன.

இந்த வளாகத்தில் ரூ.450 கோடி (25 கோடி திர்ஹாம்) செலவில் இந்திய அரங்கம் அமைக்கப்பட்டு வருகிறது. இதில் 4 ஆயிரத்து 800 சதுர அடி பரப்பளவில் பிரமாண்டமாக பல்வேறு சிறப்பம்சங்களுடன் இந்திய அரங்கம் கட்டப்பட்டு வருகிறது.

குறிப்பாக 5 டி.எஸ். என்ற கருப்பொருளில் திறன் (டேலன்ட்), வர்த்தகம் (டிரேட்), பாரம்பரியம் (டிரடிசன்), சுற்றுலா (டூரிசம்) தொழில்நுட்பம் (டெக்னாலஜி) என 5 அம்சங்கள் நிறைந்த காட்சியமைப்புகள் இடம்பெற உள்ளன. இதில் அந்த கட்டடத்தில் மகாத்மா காந்தியின் உருவம் இடம்பெறும் வகையில் வடிவமைக்கப்பட்டு வருகிறது.

இந்த கட்டடத்தின் அடிக்கல் நாட்டு விழா கடந்த 2019-ம் ஆண்டு செப்டம்பர் மாதம் மத்திய மந்திரி பியூஷ் கோயல் தலைமையில் நடைபெற்றது. தற்போது கட்டுமான பணிகள் தீவிரப்படுத்தப்பட்டு வேகமாக நடந்து வருகிறது.

இந்த நிலையில் வரும் மார்ச் 31-ஆம் தேதிக்குள் கட்டுமான பணிகளை நிறைவு செய்ய திட்டமிடப்பட்டுள்ளதாக இந்திய தூதரகம் தகவல் அளித்துள்ளது.

எக்ஸ்போ 2020 உலக கண்காட்சியில் அனைவரது கவனத்தை ஈர்க்கும் வகையில் இந்திய அரங்கம் முக்கிய இடம் பிடிக்கும் என்பது குறிப்பிடத்தக்கது.