கோலாலம்பூர், ஜனவரி 16 :
நேற்றைய நிலவரப்படி, வெள்ளப் பேரிடரால் பாதிக்கப்பட்ட ஆறு மாநிலங்களில் மொத்தம் 85,134 டன் வெள்ளக் கழிவுகள் அகற்றப்பட்டுள்ளன.
பகாங், மலாக்கா, நெகிரி செம்பிலான், கோலாலம்பூர் மற்றும் சிலாங்கூர் ஆகிய மாநிலங்களில் தூய்மைப்படுத்தும் பணிகள் 98 சதவீதத்தை எட்டியுள்ளதாகவும், ஜோகூர் 90 சதவீதத்தை எட்டியிருப்பதாகவும் வீட்டுவசதி மற்றும் உள்ளாட்சி துணை அமைச்சர் டத்தோஸ்ரீ டாக்டர் இஸ்மாயில் அப்துல் முத்தாலிப் தெரிவித்துள்ளார்.
நேற்று மட்டும், SWCorp (SWM Environment Sdn Bhd), Alam Flora Sdn Bhd மற்றும் E-Idaman ஆகிய நிறுவனங்களின் மேற்பார்வையின் கீழ் 112 இயந்திரங்கள் மற்றும் 354 பணியாளர்களை உள்ளடக்கிய மொத்தம் 438 டன் வெள்ளக் கழிவுகள் அகற்றப்பட்டன.
“சிலாங்கூரில் அதிகமாக மொத்தம் 48,589 டன் வெள்ளக் கழிவுகள் அகற்றப்பட்டன; பகாங்கில் 34,100 டன்கள்; நெகிரி செம்பிலானில் 1,400 டன்கள்; கோலாலம்பூரில் 630 டன்களும், மலாக்காவில் 139 டன்களும் அகற்றப்பட்டன.
“இதற்கிடையில், ஜோகூரில், நேற்றைய நிலவரப்படி மொத்தம் 275.63 டன் வெள்ளக் கழிவுகள் சுத்தம் செய்யப்பட்டுள்ளன,” என்று ஜோகூரில் உள்ள கம்போங் பாரு லெங்காவில் இன்று நடைபெற்ற வெள்ளத்திற்குப் பிந்தைய மெகா துப்புரவு நடவடிக்கையின் போது அவர் செய்தியாளர்களிடம் கூறினார்.
இஸ்மாயிலின் கூற்றுப்படி, வெள்ளத்திற்குப் பிந்தைய காலத்தில், பல்வேறு மறுவாழ்வு திட்டங்களுக்காக அமைச்சகம் மொத்தம் RM117.5 மில்லியன் செலவிட்டுள்ளது.
RM50 மில்லியன் செலவில் பொது வசதிகளை புனரமைத்தல் மற்றும் சேதமடைந்த வீடுகளை சரிசெய்தல் போன்ற நடவடிக்கையும் RM50 மில்லியனின் ‘மலேசிய குடும்பம் அன்பு இல்லம் ’ முன்முயற்சி ஆகியவை முன்னெடுக்கப்பட்டன.
அதுமட்டுமல்லாமல், உள்ளூர் அதிகாரிகள் (PBT) சம்பந்தப்பட்ட வெள்ளக் கழிவுகளை சுத்தப்படுத்தும் நடவடிக்கைகளுக்காக மொத்தம் RM12.5 மில்லியன் ஒதுக்கப்பட்டது, மேலும் பேரிடர் கூடை உதவிக்காக மற்றொரு RM5 மில்லியன் ஒதுக்கப்பட்டது.
“இன்னும் பல வெள்ள நிவாரண மையங்கள் திறந்திருப்பதால், வெள்ளத்திற்குப் பிந்தைய மறுவாழ்வுத் திட்டத்துக்கான மொத்த ஒதுக்கீட்டை அதிகரிக்க அரசு எதிர்பார்க்கிறது என்பதால், அமைச்சகம் இது தொடர்பான தரவுகளைச் சேகரித்து வருகிறது என்றார்.
