கோத்தா கினாபாலு, ஜனவரி 21 :
இங்குள்ள லிந்தாஸ் பிளாசாவில், இன்று காலை, ஹோட்டல் கட்டிடத்தின் நான்காவது மாடியில் இருந்து பெண் ஒருவர் குதித்தது அப்பகுதியில் இருந்தவர்களை அதிர்ச்சிக்குள்ளாக்கியுள்ளது.
காலை 8 மணியளவில் நடந்த சம்பவத்தில், 50 வயதுடைய பெண் குதிப்பதற்கு முன், கட்டிடம் ஒன்றின் வாகன நிறுத்துமிடத்தில் நின்று கொண்டிருந்ததாக கூறப்படுகிறது.
பாலர்பள்ளி ஆசிரியரான பாதிக்கப்பட்டவர், காலை 7.10 மணியளவில் கட்டிடத்திற்குள் நுழைந்து நான்காவது மாடியில் தனது வாகனத்தை நிறுத்தியிருப்பது ஆரம்ப விசாரணையில் கண்டறியப்பட்டுள்ளதாக கோத்தா கினாபாலு மாவட்ட காவல்துறைத் தலைவர், துணை ஆணையர் முகமட் ஜைதி அப்துல்லா தெரிவித்தார்.
வாகனத்தை நிறுத்திய பின்னர், அந்தப் பெண் அங்கிருந்து குதித்ததாக நம்பப்படுவதாகவும், சம்பவத்தை கவனித்த பொதுமக்கள் உதவிக்காக காவல்துறையைத் தொடர்பு கொண்டதாகவும் அவர் கூறினார்.
“காலை 8.05 மணியளவில் போலீசாருக்கு பொதுமக்களிடமிருந்து புகார் கிடைத்ததும் உடனே சம்பவ இடத்திற்கு போலீஸ் குழு அனுப்பப்பட்டது என்று அவர் கூறினார்.
”சம்பவ இடத்தில் உதவிய மருத்துவ குழுவினரால், பாதிக்கப்பட்ட அந்தப் பெண் இறந்துவிட்டதாக உறுதிப்படுத்தப்பட்டது,” என்று அவர் கூறினார்.
அவரது கூற்றுப்படி, போலீஸ் தடயவியல் குழு உயரமான இடத்தில் இருந்து விழுந்ததன் காரணமாக ஏற்பட்டிருக்கலாம் என நம்பப்படும் பல காயங்களின் தடயங்களை பாதிக்கப்பட்டவரின் உடலில் கண்டறிந்தது.
“இதுவரை, இந்த வழக்கு திடீர் மரணம் (SDR) என வகைப்படுத்தப்பட்டுள்ளது மேலும் பிரேத பரிசோதனை செயல்முறைக்கு முன்னர் கோவிட் -19 சோதனைக்கு உட்படுத்த, அவரது உடல் குயின் எலிசபெத் I மருத்துவமனையின் தடயவியல் துறைக்கு (HQEI) அனுப்பப்பட்டது,” என்று அவர் கூறினார்.
மேலும், இச்சம்பவத்தில் பெண் ஒருவர் திடீரென சாலையில் விழுந்து கிடப்பதைக் கண்டு சில வாகனமோட்டிகள் அதிர்ச்சியடைந்ததாகவும் பாதிக்கப்பட்ட பெண் சுயநினைவை இழப்பதற்கு முன்பு வலியால் புலம்புவதைப் பார்த்ததாகவும் பல சாட்சிகள் கூறினர் என்று அவர் தெரிவித்தார்.
