ஈப்போவில் கடந்த செவ்வாய்கிழமை கேமரன் ஹைலேண்ட்ஸ், பகாங்கில் ஏற்பட்ட திடீர் வெள்ளத்தில் அடித்துச் செல்லப்பட்ட வயதான பெண்ணின் உடல் இன்று காலை சுமார் 11.45 மணியளவில் கண்டெடுக்கப்பட்டது.
பகாங் தீயணைப்பு மற்றும் மீட்புத் துறையின் (JBPM) உதவி இயக்குனரான இஸ்மாயில் அப்துல் கானி கூறுகையில், 62 வயதான மரியம் பெர்டம்பன் என்பவரின் உடல்,பாதிக்கப்பட்ட இடத்திலிருந்து 500 மீட்டர் தொலைவில் ஐந்தாவது நாளில் தேடல் மற்றும் மீட்பு (SAR) குழுவினரால் கண்டுபிடிக்கப்பட்டது.
இது தொடர்பாக அவர் இன்று வெளியிட்டுள்ள அறிக்கையில், “பாதிக்கப்பட்டவரின் சடலம் மேலதிக நடவடிக்கைகளுக்காக போலீசாரிடம் ஒப்படைக்கப்பட்டுள்ளது. SAR நடவடிக்கையில் தீயணைப்பு வீரர்கள், காவல்துறை, மலேசியக் குடிமைத் தற்காப்புப் படை (APM) மற்றும் கிராம மக்கள் உட்பட சுமார் 50 மீட்புப் பணியாளர்கள் பங்கேற்றனர்.
மாலை 4.50 மணியளவில் இடம்பெற்ற இந்தச் சம்பவத்தில், பாதிக்கப்பட்டவர் மேலும் மூன்று பெண்களுடன் ஆற்றைக் கடக்கும்போது, பலத்த நீரோட்டத்தில் அடித்துச் செல்லப்பட்டுள்ளார். இச்சம்பவத்தின் போது கம்பன் சுங்கை உபி பகுதியில் சுமார் ஒரு மணி நேரம் பலத்த மழை பெய்தது தெரியவந்துள்ளது.
