கங்கார், ஜூன் 15 :
ஓட்டுநர் வகுப்புகளுக்குச் செல்லவோ அல்லது மதிப்பீட்டு சோதனைகளுக்கு உட்படுத்தவோ தேவையில்லை, அதற்குப் பதிலாக விண்ணப்பதாரர்கள் இணையத்தில் ஓட்டுநர் உரிமம் பெற ஒரு குறிப்பிட்ட தொகையை மட்டுமே செலுத்த வேண்டும் என மக்களை ஏமாற்றி, மோசடியில் ஈடுபட்ட கும்பலின் செயல் வெளிச்சத்திற்கு வந்துள்ளது.
கடந்த வெள்ளிக்கிழமை, இங்குள்ள ஜாலான் பென்ஜாராவில் மேற்கொள்ளப்பட்ட சாலைத்தடுப்பில், போலி ஓட்டுநர் உரிமம் வைத்திருந்த ஒரு உயர்கல்வி நிறுவனம் ஒன்றின் மாணவியை கைது செய்த பின்னர், போலி ஓட்டுநர் உரிமங்களை விற்பனை செய்யும் மோசடிக்கும்பலின் நடவடிக்கை பெர்லிஸ் சாலைப் போக்குவரத்துத் துறையால் கண்டறியப்பட்டது.
பெர்லிஸ் ஜேபிஜே இயக்குநர் பாத்திமா முகமட் அலி பியா கூறுகையில், 20 வயது மாணவி, தனது சகோதரரின் பல்நோக்கு வாகனத்தை (எம்பிவி) ஓட்டிக் கொண்டிருந்த போது, மோட்டார் சைக்கிள் போக்குவரத்து அமலாக்கப் பிரிவினரால் நண்பகல் 12 மணியளவில் தடுத்து வைக்கப்பட்டார்.
“ஆய்வின் போது, அவர் தனது ஓட்டுநர் உரிமத்தை சமர்ப்பித்தார், ஆனால் ஆய்வு JPJ MySikap அமைப்பு தரவுகளில் மாணவி பற்றிய எந்த தகவலையும் கண்டுபிடிக்க முடியவில்லை.
“மேலும் விசாரணையில், முகநூலில் வந்த ஒரு விளம்பரத்தைப் பார்த்து தான், தான் மலாக்காவில் ஓட்டுநர் உரிமத்தைப் பெற்றதாக மாணவி ஒப்புக்கொண்டார்.
எந்த ஓட்டுநர் வகுப்புகள் மற்றும் JPJ மதிப்பீட்டு சோதனைகளில் கலந்து கொள்ளாமல் B2 மற்றும் D வகுப்புகளுக்கு RM600 கட்டணம் செலுத்த வேண்டும் என்றார்.
“அந்தக்கும்பல் வழங்கிய இணைப்பைப் பயன்படுத்தி ஆன்லைனில் உரிமத்தை பெற்றதால், தான் பெற்ற ஓட்டுநர் உரிமம் போலியானது என்று தனக்குத் தெரியாது என்று மாணவி கூறினார்,” என்று அவர் கூறினார்.
பாத்திமா தொடர்ந்து கூறுகையில், மாணவிக்கு எதிராக சாலை போக்குவரத்து சட்டம் 1987 பிரிவு 108 (5)ன் கீழ் அவரது துறை நடவடிக்கை எடுத்தது என்றார்.
மோசடிக் கும்பல் மீதான மேலதிக விசாரணையில், ஓட்டுநர் உரிமம் பெற விரும்பும் இளைஞர்களைக் குறிவைத்து, ஓட்டுநர் நிறுவனங்களில் உண்மையான கட்டணத்தை விட குறைந்த கட்டணத்தை வழங்குவது கண்டறியப்பட்டது என்று அவர் கூறினார்.
மேலும் இந்தக் குழு “போலி உரிமம் பெறுவதற்கு கூட பதிவு செய்வதற்கான முழுமையான இணைப்பை வழங்குவதன் மூலம், மேலும் குறுகிய காலத்தில் உரிமத்தை பெறலாம் என FB அல்லது Instagram இல் விளம்பரப்படுத்தப்பட்டது,” என்று அவர் கூறினார், இந்தக் கும்பல் கண்டறியப்படுவதைத் தவிர்ப்பதற்காக தங்கள் தொலைபேசி எண்களை அடிக்கடி மாற்றுவது விசாரணையில் கண்டறியப்பட்டது.
இதுபோன்ற மோசடிகளில் சிக்காதிருக்க, பொதுமக்கள் சட்டரீதியான நிறுவனங்கள் மூலம் முறைப்படி தமது உரிமங்களை பெற்றுக்கொள்ள வேண்டும் என்றும் அவர் அறிவுறுத்தினார்.
