சிரம்பான், ஜூலை 14 :
கடலைப் பாக்கெட்டுகளில் மறைத்து RM13.48 மில்லியன் மதிப்புள்ள போதைப்பொருள் கடத்தலில் ஈடுபட்ட ஒரு அனைத்துலக போதைப்பொருள் கடத்தல் கும்பலின் செயல்பாடுகளை ரோயல் மலேசியன் சுங்கத் துறை முறியடித்துள்ளது.
சுங்கத் துறை இயக்குநர் ஜெனரல் டத்தோ ஜாசுலி ஜோஹன் இதுபற்றிக் கூறுகையில், இந்த ஆண்டு கைப்பற்றப்பட்ட மிகப் பெரிய பிடிப்பு இது என்றும், பீன்ஸ் பொதிகளில் மறைத்து வைக்கும் தந்திரம் நாட்டில் முதன்முதலில் கண்டறியப்பட்ட வழக்கு இது என்றும் கூறினார்.
ஜூலை 4 அன்று இரவு 11 மணியளவில், கோலாலம்பூர் அனைத்துலக விமான நிலையத்தில் (KLIA) ஏர் கார்கோ வளாகத்தில் இருந்த 42 பெட்டிகளை JKDM போதைப்பொருள் பிரிவு உறுப்பினர்களின் குழு கைப்பற்றியது.
“பெட்டிகளை ஆய்வு செய்ததில், 245 கிலோகிராம் எடையுள்ள கெட்டமைன் வகை போதை மருந்துகள் என சந்தேகிக்கப்படும் வெள்ளை நிற படிக பொருட்கள் அடங்கிய 49 பிளாஸ்டிக் பொட்டலங்கள் பல்வேறு வகையான பருப்புகளுடன் மறைத்து வைக்கப்பட்டிருந்தன” என்று கம்போங் ஜிஜான், நீலாயிலுள்ள JKDM தலைமையகத்தின் போதைப்பொருள் பிரிவில் இன்று நடந்த செய்தியாளர் சந்திப்பில் தெரிவித்தார்.
“முதற்கட்ட விசாரணையில், ஐரோப்பாவில் உள்ள ஒரு நாட்டிலிருந்து இப்பொட்டலங்கள் (மருந்துகள்) ஏற்றுமதி செய்யப்பட்டு, இறுதி இலக்காக KLIA இல் வந்து இறங்குவதற்கு முன்பு மேற்கு ஆசிய நாட்டிற்கு மாற்றப்பட்டிருந்தது.
இந்த வழக்கு ஆபத்தான மருந்துகள் சட்டம் 1952 இன் பிரிவு 39B (1) (a) இன் கீழ், சம்பந்தப்பட்ட சந்தேக நபர்களைக் கண்டறிய மேலதிக விசாரணைகள் இன்னும் மேற்கொள்ளப்பட்டு வருவதாக ஜாசுலி விளக்கினார்.
இந்த ஆண்டு ஜனவரி முதல் ஜூலை வரை, ஜேகேடிஎம் 20.48 மில்லியன் வெள்ளி மதிப்புள்ள 330 கிலோ பவுடர் மற்றும் கெத்தும் இலைகள் உட்பட பல்வேறு வகையான 706 கிலோ போதைப்பொருட்களை கைப்பற்றியது, இதில் கூரியர் மூலம் அனுப்பப்பட்ட போதைப்பொருட்களும் அடங்கும் என்றார்.
