கோலாலம்பூர், ஆகஸ்ட் 15 :
கடந்த ஜூலை 23-ம் தேதி, பெண் முதலாளி ஒருவருடன் ஏற்பட்ட தகராற்றில், அவருடன் கூட இருந்தவரை கத்தியால் வெட்டியதாக குற்றச்சாட்டப்பட்ட ஆடவருக்கு, இங்குள்ள செஷன்ஸ் நீதிமன்றம் இரண்டு ஆண்டுகள் சிறைத் தண்டனை விதித்து இன்று தீர்ப்பளித்தது.
குற்றம் சாட்டப்பட்ட ஈ தாமஸ் கேப்ரியல் கோம்ஸ் (22) குற்றத்தை ஒப்புக்கொண்டதையடுத்து, நீதிபதி டத்தோ நுஅமான் மஹ்மூட் ஜூஹூடி இந்த தண்டனையை வழங்கினார்.
ஜூலை 24-ம் தேதி குற்றவாளி கைது செய்யப்பட்ட தேதியிலிருந்து தண்டனையை தொடங்கவும் நீதிமன்றம் இன்று உத்தரவிட்டது.
கடந்த ஜூலை 23 ஆம் தேதி இரவு 10.45 மணிக்கு, பாசார் போரோங் கோலாலம்பூரில் உள்ள கழிவு அகற்றும் மையத்தின் முன் சம்பள கோரிக்கை பற்றி விவாதிக்க அவரின் பெண் முதலாளியை சந்தித்தபோது, பாதிக்கப்பட்ட ஏ உதய சங்கர், 33, என்பவரை பலமுறை கத்தியால் வெட்டியதாக தாமஸ் மீது குற்றம் சாட்டப்பட்டுள்ளது.
கத்தி வெட்டுக்களால் பாதிக்கப்பட்டவர் அரை மயக்கத்தில் இருந்தார் உடனடியாக செலாயாங் மருத்துவமனையில் சிகிச்சை பெற்றார், இருப்பினும் அவரது தலை, இடது தோள்பட்டை மற்றும் இடது கை விரல்களில் வெட்டுக்கள் இருந்தன.
வழக்கின் உண்மைகளின்படி, தாமஸின் முதலாளியன் பெண் ஒரு சக ஊழியரிடம் முரட்டுத்தனமாக நடந்துகொண்டதைத் தொடர்ந்து, சம்பவத்திற்கு இரண்டு வாரங்களுக்கு முன்பு அவரை அறைந்ததாகக் கூறப்படுகிறது, அதன் காரணமாக குற்றம் சாட்டப்பட்டவர் தாமஸ் பணிநீக்கம் செய்யப்பட்டார்.
குற்றவியல் சட்டத்தின் பிரிவு 326 இன் படி வழக்கு தொடரப்பட்டது, இது குற்றம் நிரூபிக்கப்பட்டால் அபராதத்துடன் அதிக பட்சமாக 20 ஆண்டுகள் சிறைத்தண்டனை வழங்குகிறது.
முன்னதாக, குற்றம் சாட்டப்பட்டவர் தரப்பு வழக்கறிஞர் கே.கோமகன், இது தனது கட்சிக்காரரின் முதல் குற்றம் என்பதாலும், அவர் குற்றத்திற்கு மனம் வருந்தியதாலும், அதை மீண்டும் செய்ய மாட்டேன் என்று உறுதியளித்ததாலும் குறைந்தபட்ச தண்டனை விதிக்குமாறு நீதிமன்றத்தை கேட்டுக் கொண்டார்.
இருப்பினும், துணை அரசு வழக்கறிஞர் அப்துல் காலிக் நசெரி, பாதிக்கப்பட்டவருக்கு ஏற்பட்ட காயங்களைக் கருத்தில் கொண்டு, குற்றவாளிக்கு ஒரு பாடமாக அமைய தகுந்த தண்டனையை கோரினார் என்பது குறிப்பிடத்தக்கது.
