சிலாங்கூர், சுங்கை பெசார் காவல் நிலையத்தில் காவலில் இருந்தபோது உள்ளூர் நபர் ஒருவர் நேற்று இறந்த வழக்கில் குற்றவியல் காயங்கள் எதுவும் கண்டறியப்படவில்லை. வெள்ளிக்கிழமை மாலை 4.20 மணியளவில் சுங்கை பூலோ மருத்துவமனையில் நடத்தப்பட்ட 49 வயது நபரின் பிரேதப் பரிசோதனையில், இறந்தவருக்கு கோவிட்-19 பாதிப்பு இல்லை என்பது கண்டறியப்பட்டதாக புக்கிட் அமான் நேர்மை மற்றும் தரநிலைகள் இணக்கத் துறை (ஜிஐபிஎஸ்) இயக்குநர் டத்தோஸ்ரீ அஸ்ரி அஹ்மட் தெரிவித்தார்.
பிரேத பரிசோதனையின் முடிவுகள், குற்றவியல் காயங்கள் எதுவும் கண்டறியப்படவில்லை என்றும், மரணத்திற்கான காரணம் ஆய்வக விசாரணை நிலுவையில் உள்ளது என்றும் கண்டறியப்பட்டுள்ளது. ஆபத்தான மருந்துகள் சட்டம் 1952 இன் பிரிவு 12(2) இன் கீழ் அந்த நபர் வியாழன் அன்று கைது செய்யப்பட்டார். வெள்ளிக்கிழமை அதிகாலை 3.30 மணியளவில், பணியில் இருந்த பணியாளர்கள் அந்த நபர் முகம் குப்புற விழுந்து மயங்கி கிடப்பதைக் கண்டு, மேல் சிகிச்சைக்காக உடனடியாக மருத்துவக் குழுவைத் தொடர்பு கொண்டனர். அதிகாலை 4.40 மணியளவில், உதவி மருத்துவ அலுவலர் அந்த நபரைப் பார்த்து, அவரது மரணத்தை உறுதிப்படுத்தினார் என்று அவர் இன்று ஒரு அறிக்கையில் தெரிவித்தார்.
விசாரணையின் முடிவுகளை மரண விசாரணை அதிகாரியிடம் ஒப்படைப்பதற்கு முன்னர் தடுப்புக்காவலில் உள்ள மரணங்கள் தொடர்பிலான குற்றப் புலனாய்வுப் பிரிவினர் பல்வேறு கோணங்களில் விசாரணைகளை முன்னெடுப்பதாக அஸ்ரி மேலும் தெரிவித்தார்.
