அட்சய திருதியை அன்று இந்த பொருட்களை தானம் கொடுத்தால் இவ்வளவு பலன்களா ?

அட்சய திருதியை அன்று பொருட்கள் வாங்குவது மட்டுமல்ல, பொருட்களை தானமாக வழங்குவதன் மூலமும் நமக்கு அளவில்லாத பலன்கள் கிடைக்கும். அட்சய திருதியை அன்று சில குறிப்பிட்ட பொருட்களை தானம் கொடுப்பதால் அவற்றின் தான பலன்களும் பல மடங்காக பெருகி நமக்கு நன்மையை ஏற்படுத்தும் என சொல்லப்படுகிறது. அட்சய திருதியை அன்று தானமாக கொடுக்க வேண்டிய பொருட்கள் பற்றியும், அதனால் கிடைக்கும் பலன்கள் பற்றியும் தெரிந்து கொள்ளலாம்.

இந்துக்களின் மிகவும் புனிதமான நாளாக, பண்டிகையாக கொண்டாடப்படுவது அட்சய திருதியை. எந்த ஒரு சுபகாரயத்தையும் செய்வதற்கும், புதியவற்றை துவங்குவதற்கும் ஏற்ற நாளாக அட்சய திருதியை நாள் கருதப்படுகிறது. அட்சய திருதியை அன்று என்ன செய்தாலும் குறைவின்றி பெருகிக் கொண்டே போகும் என்பதும், வெற்றிகரமானதாக அமையும் என்பதும் மக்களின் நம்பிக்கை. இந்த நாளில் தானம் செய்வதும், முன்னோர் வழிபாட்டினை மேற்கொள்வதும் மிகவும் சிறப்பானதாக கருதப்படுகிறது. அட்சய திருதியை நாளில் சில குறிப்பிட்ட பொருட்களை தானமாக கொடுப்பதன் மூலம் ஆயுள், செல்வ வளம் ஆகியவை பெருகும் என்று சொல்லப்படுகிறது.

அட்சய திருதியை அன்று தானம் செய்ய வேண்டிய பொருட்கள்: 

* தண்ணீர் – அட்சய திருதியை அன்று அந்தணர்களுக்கு வெற்றிலை, பாக்குடன் தண்ணீரை தானமாக கொடுப்பது நல்லது. இவ்வாறு கொடுப்பதால் மகாலட்சுமியின் அருளால் குறைவில்லாத செல்வம் உங்களை தேடி வரும் என்பது நம்பிக்கை.

* குங்குமம் – அட்சய திருதியை மங்கலகரமான நாள் என்பதால் இந்த நாளில் மஞ்சள், குங்குமம் போன்ற மங்கல பொருட்களை தானமாக கொடுப்பது மிகவும் சிறப்பானது. இந்த பொருட்களை தானம் கொடுப்பதால் வாழ்க்கையில் உயர்வான நிலையை அடைவதுடன், கணவரின் ஆயுள் பலமும் அதிகரிக்கும் என்பது நம்பிக்கை.

* சந்தனம் – சந்தனம், சந்தன கட்டை போன்றவற்றை அட்சய திருதியை அன்று தானமாக கொடுப்பதால் வாழ்க்கையில் அமைதியை ஏற்படுத்தும். அடிக்கடி வாகன விபத்துக்களை சந்திப்பவர்கள், வாகனத்தில் செல்லும் போது அடிக்கடி காயம் ஏற்படுபவர்கள் சந்தனத்தை தானமாக வழங்கலாம். இது ஆபத்துக்களில் இருந்து நம்மை பாதுகாக்கும்.

* தாம்பூலம் – வெற்றிலை, பாக்கு உள்ளிட்டவைகள் அடங்கிய தாம்பூலம் மங்கலத்தின் அடையாளமாகும். இதை அட்சய திருதியை அன்று தானமாக வழங்குவதால் வாழ்வில் முன்னேற்றம், தலைமை பதவி, குறிப்பாக அரச பதவி, நிர்வாக பொறுப்பு போன்றவை கிடைக்கும்.

* தேங்காய் – அட்சய திருதியை அன்று எவர் ஒருவர் தேங்காயை தானம் அளிக்கிறாரோ அவரின் ஏழு தலைமுறையினர் நகரத்தில் இருந்தும், பாவங்களில் இருந்தும் விடுவிக்கப்படுவார்கள்.

* நீர்மோர் – அட்சய திருதியை நாளில் நீர் மோர் தானமாக வழங்குவதால் படிப்பு, தேர்வு போன்றவற்றில் வெற்றியை பெற செய்யும். வளர்ச்சிக்கான பாதை ஏற்படும்.

* கும்ப தானம் – வெண்கலம் அல்லது வெள்ளி பாத்திரத்தில் தண்ணீர் நிரப்பி, அதில் பச்சை கற்பூரம், செந்தூரம், துளசி ஆகியவற்றை கலந்து, வெற்றிலை பாக்குடன் தட்சணை வைத்து தானமாக கொடுப்பது தானங்களில் மிகவம் முக்கியமான தானமாக கருதப்படுகிறது. விரைவில் திருமணம் நடக்க வேண்டும், பித்ருசாபத்தில் இருந்து விடுபட வேண்டும், குழந்தை பாக்கியம் பெற வேண்டும் என்பவர்கள் இந்த தானத்தை கொடுப்பதால் சிறந்த பலன் கிடைக்கும்.

* செருப்பு – அட்சய திருதியை அன்று ஏழைகளுக்கு செருப்பை தானமாக கொடுப்பால் நரகத்திற்கு செல்வது தடுக்கப்படும். செருப்பு என்பது சனி பகவானுக்கு உரிய பொருட்களில் ஒன்று என்பதால் சனியால் ஏற்படும் பிரச்சனைகளில் இருந்து இது நம்மை காக்கும்.

* போர்வை – சாலையோரத்தில் வசிப்பவர்கள், வீடு இல்லாதவர்களுக்கு பாய், போர்வை ஆகியவற்றை அட்சய திருதியை அன்று தானமாக கொடுத்தால் நீங்கள் வேண்டும் சந்தோஷம் அனைத்தும் உங்களை தேடி வரும்.

* ஆடை – ஏழைகளுக்கு அட்சய திருதியை நாளில் உடைகளை தானமாக அளிப்பதால், தானம் கொடுத்தவரின் ஆயுள் நீடிக்கும். புடவை, ரவிக்கை துணி போன்றவற்றையும் தானமாக வழங்கலாம்.

 

LEAVE A REPLY

Please enter your comment!
Please enter your name here