சர்வதேச டெஸ்ட் கிரிக்கெட்டில் இருந்து ஓய்வு எப்போது என்பது குறித்து ரவிச்சந்திரன் அஸ்வின் வெளிப்படையாக பேசியுள்ளார்.
ரவிச்சந்திரன் அஸ்வினுக்கு, தற்போது 37 வயதாகிறது. வரும் செப்டம்பர் 17ஆம் தேதி வந்தால், அஸ்வின் 38 வயதில் அடியெடுத்து வைத்துவிடுவார். இதனால், அஸ்வின் தனது கிரிக்கெட் வாழ்க்கையில் கடைசி கட்டத்தில் இருப்பதாக ரசிகர்கள் கருதுகிறார்கள்.
இந்திய அணியின் நட்சத்திர சுழற்பந்து வீச்சாளர் ரவிச்சந்திரன் அஸ்வின், மொத்தம் 100 டெஸ்ட் போட்டிகளில் விளையாடி, அதில் 516 விக்கெட்களை எடுத்துள்ளார். அதாவது, சராசரியாக ஒரு போட்டியில் 5 விக்கெட்களை எடுக்கும் ஆற்றல் அஸ்வினிடம் இருப்பதாக புள்ளி விபரம் கூறுகிறது.
ரவிச்சந்திரன் அஸ்வின், டெஸ்டில் 516 விக்கெட்களுடன் இரண்டாவது இடத்தில் இருக்கிறார். முதலிடத்தில், 619 விக்கெட்களை எடுத்து அனில் கும்ளே முதல் இடத்தில் நீடிக்கிறார்.
அனில் கும்ளே, டெஸ்டில் இருந்து ஓய்வு அறிவித்தப் பிறகு, மூன்று வருடங்கள் கழித்து 2011ஆம் ஆண்டில், அஸ்வின் அறிமுக வீரராக களமிறங்கினார். அஸ்வினின் முதல் டெஸ்டை, மறப்பது அவ்வளவு சுலபம் கிடையாது.
2011ஆம் ஆண்டில், மேற்கிந்தியத் தீவுகளுக்கு எதிராக அறிமுக வீரராக விளையாடிய அஸ்வின், முதல் போட்டியிலேயே 9 விக்கெட்களை கைப்பற்றி, ஆட்ட நாயகன் விருதினை கைப்பற்றினார்.. மேலும், அத்தொடரில் மொத்தம் 22 விக்கெட்கள், 121 ரன்களை குவித்து அசத்தினார்.
இந்நிலையில், ஓய்வு குறித்து ரவிச்சந்திரன் அஸ்வின், 2017ஆம் ஆண்டில் தெரிவித்த கருத்து தற்போது வைரலாகி வருகிறது. அதில், ‘‘அனில் கும்ளே 619 விக்கெட்களை எடுத்துள்ளார். நான் 618 விக்கெட்களை எடுத்த உடனே ஓய்வு அறிவித்துவிடுவேன். என்று 618 விக்கெட்களை எடுக்கிறேனோ, அதுதான் எனது கடைசி டெஸ்டாக இருக்கும்’’ எனத் தெரிவித்தார்.
ரவி அஸ்வின், தற்போதுவரை 516 டெஸ்ட் விக்கெட்களை எடுத்துள்ளார். இன்னமும் 104 விக்கெட்களை எடுத்து, கும்ளேவின் சாதனையை தகர்க்க, அவருக்கு குறைந்தது 20 டெஸ்ட் போட்டிகள் தேவைப்படும்.இந்திய அணி, அடுத்து வரும் மாதங்களில் அதிக டெஸ்ட் போட்டிகளில் விளையாட உள்ளது.
அதாவது, அடுத்த 5 மாதங்களில் வங்கதேசத்திற்கு எதிராக 2, நியூசிலாந்துக்கு எதிராக 3, ஆஸ்திரேலியாவுக்கு எதிராக 5 டெஸ்ட் போட்டிகளில் இந்தியா விளையாட உள்ளது என்பது குறிப்பிடத்தக்கது.
