(எம்.எஸ்.மணியும்)
சிப்பாங்,
ஒரே நேரத்தில் 14 விமானங்கள் பழுது நீக்கம், பராமரிப்பு, முழு சோதனைக்கு உட்படுத்துவது போன்ற வசதிகளை கொண்டிருக்கும் ஏடிஈ எனப்படும் ஆசிய டிஜிட்டல் இன்ஜினியரிங் நிறுவனம் மலேசிய சாதனை புத்தகத்தில் இடம் பிடித்துள்ளது.
சிப்பாங் அனைத்துலக விமான நிலைய அருகில் அமைந்திருக்கும் ஆசியா டிஜிட்டல் இன்ஜினியரிங்கின் விமானங்களை பழுது நீக்கம் செய்யும் இரண்டு மிகப் பெரிய கிடங்குகள் அதிகாரப்பூர்வமாக திறப்பு விழா கண்டன.
விமானம் பழுது நீக்கம் செய்யும் மலேசியாவில் மிகப் பெரிய வசதியை கொண்டிருக்கும் முதல் நிறுவனமாக திகழும் ஆசியா டிஜிட்டல் இன்ஜினியரிங் நிறுவனத்திற்கு வருகை புரிந்த மலேசிய சாதனை புத்தக அமைப்பின் அதிகாரிகள் ஏடிஈ நிறுவனத்தின் உயர் அதிகாரிகளிடம் மலேசிய சாதனை புத்தக சான்றிதழை வழங்கினர்.
இந்நிகழ்ச்சியில் கெப்பிட்டல் ஏ நிறுவனத்தின் தலைவர் கமாருடின் மெரானூன், கெப்பிட்டல் ஏ நிறுவனத்தின் தலைமை செயல் அதிகாரி டான்ஸ்ரீ டோனி பெர்ணாண்டஸ், முன்னாள் துணைப் பிரதமர் துன் மூசா ஹீத்தாம் உட்பட பல உயர் அதிகாரிகள் கலந்து கொண்டனர்.
இந்நிகழ்ச்சிக்குப் பிறகு ஆசியா டிஜிட்டல் இன்ஜினியரிங் நிறுவனத்தின் தலைமை செயல் அதிகாரி ஜெ.மகேஷ்குமாரிடம் மக்கள் ஓசை ஒரு சிறப்பு சந்திப்பை நடத்தியது.
ஆசியா டிஜிட்டல் இன்ஜினியரிங் நிறுவனம் என்பது கெப்பிட்டல் ஏ நிறுவனத்தின் கீழ் வரும் ஒரு துணை நிறுவனமாகும். கெப்பிட்டல் ஏ நிறுவனத்தின் கீழ் தற்போது ஏர் ஆசியா விமான நிறுவனம், பிக் பே, ஆசியா ரைட். சந்தான் போன்ற நிறுவனங்களோடு ஆசியா டிஜிட்டல் இன்ஜினியரிங் நிறுவனமும் இயங்கி வருகிறது. கெப்பிட்டல் ஏ குழுமத்தின் தலைமை செயல் அதிகாரியாக தற்போது டான்ஸ்ரீ டோனி பெர்னாண்டஸ் பொறுப்பு வகித்து வருகிறார்.
ஆசியா டிஜிட்டல் இன்ஜினியரிங் நிறுவனத்தின் பணி என்பது விமானங்களை பழுது பார்ப்பது என்று ஒற்றை வரியில் சொன்னாலும் இதனுடைய பணி என்பது பல நிலைகளை கடந்து வரவேண்டும் என்பதே உண்மை. இன்னும் தெளி வாக சொல்லவேண்டும் என்றால் நாம் தினசரி பயன்படுத்தும் கார், உட்பட மற்ற வாகனங்களை மூன்று அல்லது ஆறு மாதங்களுக்கு ஒரு முறை சேவை மையத்திற்கு (சர்வீஸ் செண்டருக்கு ) அனுப்பி அங்கு வாகனங்களில் ஏற்பட்டிருக்கும் குறைகளை நீக்கி, எண் மாற்றப்பட்டு மீண்டும் வாகனம் சீராக இயங்குவதற்கு வழி அமைத்துத் தரப்படும்.
கெப்பிட்டல் ஏ குழுமத்தின் கீழ் இயங்கும் அனைத்து ஏர் ஆசியா விமானங்களும் முழு சோதனைக்காகவும், மறுசீரமைப்பிற்காவும் இது நாள் வரை சிங்கப்பூர், சீனா, பிலிப்பைன்ஸ் போன்ற நாடுகளுக்கு அனுப்பப்பட்டு வந்தது. அதன்படி மேற்கண்ட சோதனைக்கும் மறுசீரமைப்பிற்கும் ஏற்படும் செலவு ஒரு விமானத்திற்கு கிட்டத்தட்ட பத்து லட்சம் ரிங்கிட் முதல் நாற்பது லட்சம் ரிங்கிட் வரை பிடிக்கும் என்று நமது சந்திப்பில் விவரித்தார் மகேஷ்குமார்.
