மலேசிய துணை பிரதமரும், கிராம மற்றும் பிராந்திய வளர்ச்சி அமைச்சருமான டத்தோஸ்ரீ டாக்டர் அமாட் ஜாஹிட் ஹமிடி இன்று காலை நியூசிலாந்தின் ஆக்லாந்திற்கு தனது ஐந்து நாள் அதிகாரபூர்வ பணிப்பயணத்தை தொடங்கினார்.
உள்ளூர் நேரப்படி காலை 11.30 மணியளவில் (மலேசிய நேரம் 5.30am) ஆக்லாந்து அனைத்துலக விமான நிலையத்தில் அவர் தரையிறங்கினார். அவரை மலேசிய தூதுவர் மஜிதா மார்சுகி மற்றும் நியூசிலாந்து வெளிநாட்டு அமைச்சகத்தின் ஆசிய அமெரிக்க பிரிவு துணை செயலாளர் கிராஹாம் மோர்டன் வரவேற்றனர்.
இப்பயணம் இரு நாடுகளுக்கு இடையிலான நீண்டகால இருதலைப் பிணைப்புகளை வலுப்படுத்தும் முயற்சியின் ஒரு பகுதியாகும் என ஜாஹிட் தனது ஃபேஸ்புக் பதிவில் குறிப்பிட்டுள்ளார். மேலும், இருநாடுகளும் பல துறைகளில் உச்ச நிலை கூட்டாண்மையை விரிவுபடுத்தும் நோக்கத்துடன் செயல்படுவதாகவும் அவர் கூறினார்.
இப்பயணத்தின் போது அவர் நியூசிலாந்து துணை பிரதமர், வெளியுறவு அமைச்சர், மற்றும் பல முக்கிய பிரமுகர்களை சந்திக்கவுள்ளார்.
அதோடு, ஹலால் தொழில் தொடர்பான மன்ற நிகழ்ச்சியில் பங்கேற்கவுள்ளதுடன், உயர் கல்வி தொடர்பான ஒப்பந்தங்களும் கையெழுத்தாகவுள்ளன. மேலும் நியூசிலாந்தில் வசிக்கும் மலேசியர்களுடன் சந்திப்பு நிகழ்ச்சியும் உள்ளடக்கப்பட்டுள்ளது.
