கோலாலம்பூர், ஜனவரி 31:
கோலாலம்பூர் மாநகராட்சி (DBKL), போலீஸ், குடிநுழைவுத் துறை மற்றும் பல அரசு நிறுவனங்கள் இணைந்து நடத்திய ‘ஒப்ஸ் காசாக்’ (Ops Gasak) எனும் அதிரடிச் சோதனையில், விதிகளுக்குப் புறம்பாகச் செயல்பட்ட வணிக நிறுவனங்கள் மீது கடும் நடவடிக்கை எடுக்கப்பட்டுள்ளது.
உரிய வணிக உரிமம் இன்றி வெளிநாட்டவர்களால் நடத்தப்பட்டு வந்த 4 கடைகள் உடனடியாக மூடப்பட்டன.
பணி அனுமதிப்பத்திரத்தைத் தவறாகப் பயன்படுத்தியது மற்றும் விசா காலம் முடிந்தும் தங்கியிருந்தது ஆகிய காரணங்களுக்காக 20 இந்தோனேசியர்கள் (16 ஆண்கள், 4 பெண்கள்) குடிவரவுத் துறையினரால் கைது செய்யப்பட்டனர்.
பொது இடங்களுக்கு இடையூறு விளைவித்த ஒரு கடையின் பொருட்கள் பறிமுதல் செய்யப்பட்டன. மேலும், வரி செலுத்தப்படாத மதுபானங்கள் மற்றும் பீர் வகைகளைச் சுங்கத்துறை அதிகாரிகள் கைப்பற்றினர். இதன் வரி மதிப்பு சுமார் 30,570 ரிங்கிட் ஆகும்.
உரிமம் இன்றி இயங்கியது மற்றும் வெளிநாட்டவர்களை வேலைக்கு அமர்த்தியது போன்ற குற்றங்களுக்காக 21 அபராத நோட்டீஸ்கள் வழங்கப்பட்டன.
விலைப்பட்டியல் வைக்காதது மற்றும் எடை அளவீட்டு கருவிகளில் குளறுபடி செய்ததற்காக 1,500 ரிங்கிட் அபராதம் விதிக்கப்பட்டது. வணிகப் பதிவுச் சான்றிதழைத் காட்சிப்படுத்தாதது மற்றும் நிறுவனப் பெயரைப் பலகைகளில் குறிப்பிடாதது போன்ற குற்றங்களுக்காக 11 அபராத நோட்டீஸ்கள் வழங்கப்பட்டன.
தலைநகரில் சட்டவிரோத வணிக நடவடிக்கைகளைக் கட்டுப்படுத்த இத்தகைய ஒருங்கிணைந்த சோதனைகள் அவ்வப்போது தொடரும் என DBKL தெரிவித்துள்ளது. பொதுமக்கள் இது போன்ற சட்டவிரோதச் செயல்கள் குறித்துத் தெரிந்தால், அதிகாரப்பூர்வ புகாரிடம் வழியாகத் தகவல் தெரிவிக்கலாம் என கேட்டுக்கொள்ளப்பட்டுள்ளது.
