மூவார், பிப்ரவரி 8, 2026:
ஜோகூரின் மூவார், ஆயிர் ஈத்தாம் (Air Itam) பகுதியில் உள்ள ஜோகூர் விவசாயிகள் சங்கத்திற்குச் சொந்தமான தோட்டத்தில் ஏற்பட்டுள்ள பெரும் தீயை அணைக்கும் பணியின் போது, நிலத்தடியில் மர்மமான முறையில் இரண்டு சிறிய வெடிப்புகள் ஏற்பட்டுள்ளன.
முதன்முதலில் பிப்ரவரி 3-ஆம் தேதி ஒரு வெடிப்புச் சத்தம் கேட்ட நிலையில், நேற்று (சனிக்கிழமை) மீண்டும் ஒரு வெடிப்பு ஏற்பட்டுள்ளது. இந்த இரண்டு வெடிப்புகளும் ‘செக்டர் D’ (Sector D) எனப்படும் பகுதியில் நிகழ்ந்துள்ளன.
நிலத்தடியில் தொடர்ந்து எரிந்து வரும் தீயினால் (Underground peat fire) இந்த வெடிப்புகள் ஏற்பட்டிருக்கலாம் எனப் போலீசார் சந்தேகிக்கின்றனர் என்று, மூவார் மாவட்ட போலீஸ் தலைவர் ஏசிபி ராய்ஸ் முக்லிஸ் அஸ்மான் அஜிஸ் கூறினார்.
“பாதுகாப்பு கருதி ‘செக்டர் D’ பகுதிக்கு முழுமையாகச் சீல் வைக்கப்பட்டுள்ளது. அப்பகுதியில் நிலவும் அடர்ந்த புகை மற்றும் நிலையற்ற நிலப்பரப்பு (Loose peat soil) காரணமாக, வெடிப்பு நிகழ்ந்த துல்லியமான இடத்தைக் கண்டறிவதில் சிக்கல் நீடிக்கிறது என்றார் அவர்.”
தீப்பரவலைக் கட்டுப்படுத்த நிலத்தரை வீரர்களை அனுப்புவதற்குப் பதிலாக, தற்போது வான்வழித் தாக்குதல் (Aerial operations) மூலம் தீயை அணைக்கும் பணிகள் முடுக்கிவிடப்பட்டுள்ளன.
அத்துடன் அகஸ்டா AW139 (Agusta AW139) ரக ஹெலிகாப்டர் மூலம் வான்வழியாகத் தண்ணீர் ஊற்றித் தீயை அணைக்கும் பணி (Water-bombing) தீவிரமாக நடைபெற்று வருகிறது.
மொத்தம் 4 பிரிவுகளாகத் தீ பரவியுள்ளது என்றும், தீப்பரவல் ஏற்பட்டுள்ள பகுதிக்கு அருகே பொதுமக்கள் யாரும் செல்ல வேண்டாம் என்றும், அதிகாரிகளின் உத்தரவுகளை முறையாகப் பின்பற்றுமாறும் காவல்துறை கேட்டுக்கொண்டுள்ளது. நிலத்தடித் தீயானது கண்களுக்குத் தெரியாமல் வேர் வழியாகப் பரவக்கூடியது என்பதால் மிகுந்த எச்சரிக்கை தேவை என அறிவுறுத்தப்பட்டுள்ளது.
