மலாக்கா:
மலாக்காவின் பாடாங் ஜம்பு (Padang Jambu) போக்குவரத்து சந்திப்பில் நேற்று நிகழ்ந்த கோர விபத்து தொடர்பாக, 35 வயதுடைய கார் ஓட்டுநரை நான்கு நாட்கள் விளக்கமறியலில் வைக்க நீதிமன்றம் உத்தரவிட்டுள்ளது.
நேற்று மதியம் 2 மணியளவில், மலாக்கா நகரிலிருந்து புக்கிட் பெருவாங் நோக்கிச் சென்ற Perodua Myvi கார் ஒன்று, கட்டுப்பாட்டை இழந்து எதிர்த் திசையில் இருந்த பாதையில் புகுந்தது. அப்போது போக்குவரத்து சிக்னலுக்காகக் காத்திருந்த இரண்டு கார்கள் மற்றும் மூன்று மோட்டார் சைக்கிள்கள் மீது அந்த கார் பலமாக மோதியது.
இந்த விபத்தில் ஷாரோல் அன்வார் முகமட் ரோபி (வயது 44) என்ற மோட்டார் சைக்கிள் ஓட்டுநர் சம்பவ இடத்திலேயே உயிரிழந்தார். அவரது தலை, முகம் மற்றும் உடல் பகுதிகளில் பலத்த காயங்கள் ஏற்பட்டதே மரணத்திற்கு காரணம் என மலாக்கா தெங்கா மாவட்ட காவல்துறைத் தலைவர் கிறிஸ்டோபர் பாட்டிட் உறுதிப்படுத்தியுள்ளார். மேலும் இந்த விபத்தில் நால்வர் காயமடைந்தனர்.
ஓட்டுநர் கார் ஓட்டும்போதே ஒரு நிமிடம் கண்ணயர்ந்ததால் (Microsleep) இந்த விபத்து நேர்ந்ததாக முதற்கட்ட விசாரணையில் நம்பப்படுகிறது.
கைது செய்யப்பட்ட ஓட்டுநர் மீது 1987-ஆம் ஆண்டு சாலைப் போக்குவரத்துச் சட்டத்தின் பிரிவு 41(1)-இன் கீழ் (அலட்சியமாக வாகனம் ஓட்டி மரணத்தை விளைவித்தல்) காவல்துறை விசாரணை நடத்தி வருகின்றனர்.
இதற்காக மாஜிஸ்திரேட் உத்மான் அப்துல் கனி, சந்தேக நபரை இன்று முதல் 4 நாட்களுக்கு விளக்கமறியலில் வைக்க அனுமதி வழங்கியுள்ளார்.
மேலும் வாகனம் ஓட்டும்போது சோர்வாக உணர்ந்தால், உடனடியாக பாதுகாப்பான இடத்தில் நிறுத்தி ஓய்வெடுக்குமாறு போக்குவரத்துத் துறை தொடர்ந்து அறிவுறுத்தி வருகிறது.
மலாக்கா விபத்து குறித்த காணொளி
இந்தக் காணொளி, மலாக்கா நெடுஞ்சாலையில் ஆறு வாகனங்கள் மோதிய விபத்து குறித்த கூடுதல் காட்சிகளையும் தகவல்களையும் வழங்குகிறது.
