குவா மூசாங்:
பள்ளிக் கழிவறையிலும் தொழுகை அறையிலும் (Surau) மாணவிகளை ரகசியமாக எட்டிப் பார்த்ததாகக் கூறப்படும், பள்ளித் தலைமை ஆசிரியையின் கணவர் போலீசாரால் கைது செய்யப்பட்டுள்ளார். இச்சம்பவம் கிளந்தான், குவா மூசாங் பகுதியில் உள்ள ஒரு பள்ளியில் அரங்கேறியுள்ளது.
60 வயதான அந்த முதியவர், பள்ளி வளாகத்திற்குள் சந்தேகத்திற்கு இடமான முறையில் நடமாடி, சிறுமிகளை எட்டிப் பார்ப்பதாக மாணவிகளும் பெற்றோர்களும் அளித்த புகார்களின் அடிப்படையில் இந்நடவடிக்கை எடுக்கப்பட்டுள்ளதாக குவா மூசாங் மாவட்ட போலீஸ் தலைவர் சுப்ரிடெண்டண்ட் சிக் சூன் ஃபூ (Superintendent Sik Choon Foo) உறுதிப்படுத்தியுள்ளார்.
கடந்த ஏப்ரல் மற்றும் மே மாத இடைவெளியில் இச்சம்பவங்கள் தொடர்ந்து நடந்துள்ளதாகத் தெரிகிறது.
பள்ளி வளாகத்தில் உள்ள கழிவறை மற்றும் தொழுகை அறைக்கு மாணவிகள் செல்லும்போது, அந்த முதியவர் அவர்களைக் கண்காணித்து எட்டிப் பார்த்ததாகக் குற்றம் சாட்டப்பட்டுள்ளது.
கைது செய்யப்பட்டுள்ள சந்தேக நபர், ‘2017 சிறுவர் பாலியல் குற்றச் சட்டத்தின்’ (Sexual Offences Against Children Act 2017) கீழ் மேல் விசாரணைக்காக தற்போது 7 நாட்கள் போலீஸ் காவலில் (Remand) வைக்கப்பட்டுள்ளார்.
பள்ளியின் தலைமை ஆசிரியையின் கணவரே இத்தகைய செயலில் ஈடுபட்டு கைது செய்யப்பட்டிருப்பது அப்பகுதியில் பெரும் பரபரப்பை ஏற்படுத்தியுள்ளது.
