கோலாலம்பூர்:
முன்னாள் காதலியின் அனுமதியின்றி அவரது அந்தரங்கப் புகைப்படங்களை இணையத்தில் பகிர்ந்த வாலிபருக்கு, பாலியல் துன்புறுத்தலுக்கு எதிரான தீர்ப்பாயம் விதித்த RM60,000 இழப்பீட்டு உத்தரவைக் கோலாலம்பூர் உயர் நீதிமன்றம் இன்று உறுதி செய்து தீர்ப்பளித்துள்ளது.
இதுகுறித்து பெண்கள், குடும்பம் மற்றும் சமூக மேம்பாட்டு அமைச்சு இன்று வெளியிட்டுள்ள அறிக்கையில், கடந்த 2024 ஆகஸ்ட் 1-ஆம் தேதி தீர்ப்பாயம் வழங்கிய உத்தரவை உயர் நீதிமன்றம் அப்படியே ஏற்றுக்கொண்டுள்ளதாகத் தெரிவித்துள்ளது.
அந்த உத்தரவின்படி, குற்றம் சாட்டப்பட்ட நபர் பாதிக்கப்பட்ட பெண்ணிடம் எழுத்துப்பூர்வமாக மன்னிப்புக் கேட்க வேண்டும், மனநல ஆலோசனை வகுப்புகளில் (Counselling sessions) கட்டாயம் கலந்துகொள்ள வேண்டும் மற்றும் அந்தப் பெண்ணுக்கு இழப்பீடாக RM60,000 வழங்க வேண்டும் என்று குறிப்பிடப்பட்டிருந்தது.
“கோலாலம்பூர் உயர் நீதிமன்றத்தின் இந்த முடிவு, டிஜிட்டல் பாலியல் துன்புறுத்தல் உள்ளிட்ட பாலியல் அத்துமீறல்களால் பாதிக்கப்படுபவர்களுக்கு விரைவான, எளிமையான மற்றும் பயனுள்ள முறையில் நீதியைப் பெற்றுத் தருவதில் இந்தத் தீர்ப்பாயத்தின் முக்கியப் பங்கை மீண்டும் உறுதிப்படுத்தியுள்ளது,” என்று அமைச்சின் அறிக்கை கூறுகிறது.
கடந்த 2024 மார்ச் 8-ஆம் தேதி நிறுவப்பட்ட இந்த ‘பாலியல் துன்புறுத்தலுக்கு எதிரான தீர்ப்பாயம்’, பாதிக்கப்பட்டவர்கள் சிவில் நீதிமன்றங்களுக்குச் சென்று நீண்ட காலம் காத்திருப்பதைத் தவிர்த்து, தங்களின் புகார்களுக்கு மிக விரைவாகத் தீர்வு காண்பதற்கான ஒரு மாற்று வழியை வழங்குகிறது என்று அமைச்சு சுட்டிக்காட்டியுள்ளது.
“இந்தத் தீர்ப்பாயத்தின் ஸ்தாபிதம், நாட்டில் பாலியல் துன்புறுத்தல்களால் பாதிக்கப்படுபவர்களுக்கான பாதுகாப்பை வலுப்படுத்துவதிலும், ஒரு பாதுகாப்பான, கண்ணியமான சமூகத்தை உருவாக்குவதிலும் ஒரு மிக முக்கியமான மைல்கல்லாகும்,” என்றும் அந்த அறிக்கையில் கூறப்பட்டுள்ளது.
வார்த்தைகள் மூலமாகவோ, சைகைகள், காட்சிகள் அல்லது உடல் ரீதியாக என எந்த வடிவத்திலாவது பாலியல் துன்புறுத்தல்களுக்கு ஆளாகும் எவரும் இந்தத் தீர்ப்பாயத்தில் தாராளமாகப் புகார் அளிக்கலாம்.
மேலும் விபரங்களுக்கு, ‘தாலியான் காசிஹ்’ (Talian Kasih) மையத்தின் 15999 என்ற எண்ணுக்கோ, 019-2615999 என்ற வாட்ஸ்அப் எண்ணுக்கோ தொடர்பு கொள்ளலாம் அல்லது தீர்ப்பாயத்தின் அதிகாரபூர்வ இணையப் பக்கத்தைப் பார்வையிடலாம்.
