கோலாலம்பூர்:
வரும் சனிக்கிழமை நடைபெறவிருக்கும் ஜோகூர் மாநிலத் தேர்தலுக்குப் பிறகு, பெரிகாத்தான் நேஷனல் (PN) கூட்டணியால் மாநில அரசை அமைக்க முடியாமல் போகலாம் என்பதை பெர்சத்து (Bersatu) தலைவர் டான்ஸ்ரீ முஹிடின் யாசின் ஒப்புக்கொண்டுள்ளார்.
இருப்பினும், மாநில நிர்வாகத்தைக் கண்காணித்துச் சமநிலைப்படுத்துவதற்கு (Check and balance) ஏதுவாக, தங்களுக்குப் போதிய இடங்களை உறுதி செய்ய பிஎன் கூட்டணிக்கு வாக்களிக்குமாறு அவர் வாக்காளர்களைக் கேட்டுக்கொண்டார்.
மாநிலச் சட்டமன்றத்தில் வலுவான ஓர் எதிர்க்கட்சித் தொகுதி இருப்பது, மாநில அரசின் கொள்கைகளையும் செலவினங்களையும் திறம்படக் கண்காணிக்க மிகவும் முக்கியம் என்று அவர் குறிப்பிட்டார்.
“அரசாங்கம் தன் இஷ்டத்திற்குச் செயல்படக் கூடாது என்பதை உறுதி செய்யவே நாம் இத்தகைய கண்காணிப்புப் பாத்திரத்தை வகிக்க விரும்புகிறோம். அவர்கள் 40 இடங்களை வென்றுவிட்டால், மக்கள் தங்களுக்கு ஆதரவளிக்கிறார்கள் என்ற மெத்தனப் போக்கில் எதையும் செய்யாமல் இருந்துவிடுவார்கள். இறுதியில் மக்களுக்கு எதுவும் கிடைக்காமல் போய்விடும்” என்று, நேற்று இரவு பாரிட் ராஜாவில் (Parit Raja) நடைபெற்ற ‘ஜோகூருக்காக பெர்சத்து’ (Bersatu Demi Johor) பிரசாரக் கூட்டத்தில் முஹிடின் கூறினார்.
மாநில அரசை அமைப்பதற்கான பெரும்பான்மை கிடைக்காமல் போனாலும், மக்கள் நலனுக்காகப் போராடக்கூடிய மற்றும் பயனுள்ள எதிர்க்கட்சியாகச் செயல்படக்கூடிய பலத்தை வழங்க மக்கள் பிஎன் கூட்டணிக்கு வாக்களிக்க வேண்டும் என்று அவர் வலியுறுத்தினார்.
ஜோகூர் மாநிலத் தேர்தலின் மொத்தமுள்ள 56 தொகுதிகளில், பெரிகாத்தான் நேஷனல் 33 இடங்களில் மட்டுமே போட்டியிடுகிறது. அதே வேளையில், பாரிசான் நேஷனல் (BN) மற்றும் பக்காத்தான் ஹரப்பான் (PH) ஆகிய கூட்டணிகள் தனித்தனியாக 56 தொகுதிகளிலும் களம் காண்கின்றன என்பது குறிப்பிடத்தக்கது.
