கோலாலம்பூர்:
நெகிரி செம்பிலான் மாநிலத் தேர்தலில் பக்காத்தான் ஹராப்பான் (PH) கூட்டணியின் ‘போஸ்டர் பாய்’ மற்றும் மந்திரி பெசார் வேட்பாளராக டத்தோ ஸ்ரீ அமினுடின் ஹாரூன் அதிகாரப்பூர்வமாக அறிவிக்கப்பட்டுள்ளார்.
நேற்று இரவு நடைபெற்ற பக்காத்தான் ஹராப்பான் வேட்பாளர் அறிமுக விழாவில் உரையாற்றிய DAP பொதுச்செயலாளர் ஆண்டனி லோக் இத்தகவலை வெளியிட்டார்.
கூட்டரசு மட்டத்தில் தாம் அமைச்சராகப் பொறுப்பு வகித்தாலும், நெகிரி செம்பிலான் மாநிலத்தில் தனக்கு பாஸ் (Boss) ‘தோக் மின்’ (அமினுடின்) தான் என்று அவர் நெகிழ்ச்சியோடு குறிப்பிட்டார். 2018 முதல் அமினுடின் தலைமையிலான மாநில அரசு மிகச் சிறந்த சாதனைகளைப் படைத்துள்ளதாக அவர் புகழாரம் சூட்டினார். இந்த விழாவை PH தலைவர் டத்தோ ஸ்ரீ அன்வார் இப்ராகிம் அதிகாரப்பூர்வமாகத் தொடக்கி வைத்தார்.
இதற்கிடையில், தேர்தல் பிரச்சாரங்களின் போது நெகிரி செம்பிலான் மாநிலத்தின் பாரம்பரிய முறைகளுக்கும் (Adat), மன்னராட்சி முறைக்கும் தகுந்த மரியாதை அளிக்க வேண்டும் என்று அமினுடின் தனது தொண்டர்களைக் கேட்டுக்கொண்டார்.
அரசியலமைப்புச் சட்டம், மன்னராட்சி மற்றும் ருகுன் நெகாரா ஆகிய கோட்பாடுகளை DAP எப்போதும் உறுதியாகப் பின்பற்றி வருகிறது என்று குறிப்பிட்ட அவர், நெகிரி செம்பிலானின் ‘உண்டாங் யாங் எம்பாட்’ (நான்கு ஆளும் தலைவர்கள்), துங்கு பெசார் தம்பின் மற்றும் பாரம்பரிய வழக்கங்களுக்கு கட்சி எப்போதும் விசுவாசமாக இருக்கும் என்றார். பிரச்சாரத்தின் போது எக்காரணத்தைக் கொண்டும் மாநிலத்தின் பாரம்பரிய முறைகளைக் கேலி செய்யவோ, அவமதிக்கவோ கூடாது என அவர் தொண்டர்களுக்குக் கடுமையான அறிவுறுத்தலை வழங்கினார்.
