4 கிலோவுக்கும் அதிகமான ஹைட்ரோபோனிக் கஞ்சாவை நாட்டிற்குள் கடத்த முயன்றதாகக் கூறப்படும் மலேசியர் ஒருவர், இந்தியாவின் சென்னை அனைத்துலக விமான நிலையத்தில் தடுத்து வைக்கப்பட்டார். பயணி ஆகஸ்ட் 7 அன்று பாங்காக்கிலிருந்து வந்து, எந்தப் பொருட்களையும் அறிவிக்காமல் நாட்டை விட்டு வெளியேற முயன்றதாக சென்னை சுங்கத்துறை கூறியதாக ஹரியான் மெட்ரோ செய்தி வெளியிட்டுள்ளது.
விமானப் புலனாய்வுப் பிரிவின் அதிகாரிகள், பயணிகளின் குணாதிசயங்களை ஆராய்ந்ததன் அடிப்படையில் அந்தப் பயணியைத் தடுத்து நிறுத்தினர். பயணியின் பயணப் பெட்டியை எக்ஸ்-ரே ஸ்கேன் செய்தபோது சந்தேகத்திற்கிடமான படங்கள் தென்பட்டதால், மேலதிக ஆய்வு மேற்கொள்ளப்பட்டது. மேலும் ஆய்வு செய்ததில், கடுமையான மற்றும் நெடிய வாசனையுடன் கூடிய, பச்சை நிறக் கட்டிகளைக் கொண்ட நான்கு பொட்டலங்கள் கண்டெடுக்கப்பட்டன. அவை உயர்தர ஹைட்ரோபோனிக் கஞ்சாவாக இருக்கலாம் என சந்தேகிக்கப்படுகிறது.
“சோதனை செய்யப்பட்ட பயணப் பெட்டியின் அடிப்பகுதியில், பிரத்யேகமாக உருவாக்கப்பட்ட ஒரு மறைவிடத்தில் அந்தப் பொட்டலங்கள் மறைத்து வைக்கப்பட்டிருந்தன,” என்று சென்னை சுங்கத்துறை கூறியதாக, இந்தியாவின் பத்திரிக்கைத் தகவல் பணியகம் நேற்று வெளியிட்ட ஒரு அறிக்கையில் மேற்கோள் காட்டப்பட்டுள்ளது.
4,033 கிராம் எடையுள்ள அந்தப் பொருள், போதைப்பொருள் கண்டறியும் கருவியைப் பயன்படுத்தி நடத்தப்பட்ட சோதனையில் கஞ்சா என உறுதியானது. இந்தியாவின் போதைப்பொருள் மற்றும் மனோவியல் பொருட்கள் சட்டம் 1985-இன் பிரிவு 43(a)-இன் கீழ் அந்தப் போதைப்பொருட்கள் பறிமுதல் செய்யப்பட்டன. ஹைட்ரோபோனிக் கஞ்சா என்பது, மண் இல்லாமல், ஊட்டச்சத்து நிறைந்த நீரைப் பயன்படுத்தி, பொதுவாகக் கட்டுப்படுத்தப்பட்ட ஒளி, வெப்பநிலை மற்றும் ஈரப்பதத்தின் கீழ் வீட்டிற்குள் வளர்க்கப்படும் ஒரு முறையாகும்.
