9 மாதங்களாக விண்வெளியில் சிக்கி இருக்கும் சுனிதா வில்லியம்ஸ், புட்ச் வில்மோர் ஆகியோருக்கு நாசா எவ்வளவு சம்பளம் வழங்கும் என்று மக்களிடையே கேள்விகள் எழும்பியுள்ளன. நாசா விண்வெளி வீரர்களான இவ்விருவரும் ஒன்பது மாதங்களுக்கும் மேலாக அனைத்துலக விண்வெளி நிலையத்தில் உள்ளனர்.
நாசா வெளியிட்ட அறிக்கையின்படி, இவர்கள் இருவரும் நீண்ட காலம் விண்வெளியில் தங்கியிருந்த போதிலும், கூடுதல் நேர ஊதியத்தைப் பெற மாட்டார்கள்.
ஓய்வுபெற்ற விண்வெளி வீரர் கேடி கோல்மேனின் கூற்றுப்படி, நாசா விண்வெளி வீரர்கள் கூட்டாட்சி ஊழியர்கள் ஆவர். எனவே அவர்கள் விண்வெளியில் செலவிடும் நேரம் அவர்களின் வழக்கமான வேலையின் ஒரு பகுதியாகக் கருதப்படுகிறது. அவர்கள் தற்செயலான நிகழ்வுகளுக்கு 4 டாலர் என்ற சிறிய தினசரி உதவித்தொகையைப் பெறுகிறார்கள்.
அதாவது 287 நாட்கள் விண்வெளியில் இருந்த பிறகு, அவர்கள் தலா 1,148 டாலர் கூடுதலாகப் பெறுவார்கள்.
அவர்கள் ஆண்டுக்கு 125,133 – 162,672 டாலர் வரை சம்பாதிக்கிறார்கள்.
அந்தவகையில் ஒன்பது மாத பணிக்கு 93,850 – 122,004 டாலர் சம்பளத்தைப் பெறுவார்கள்.
