கோலாலம்பூர்:
மலேசியாவில் நிலநடுக்கம் ஏற்படக்கூடிய 14 அபாயப் பகுதிகள் (earthquake hotspots) அடையாளம் காணப்பட்டுள்ளதாக மலேசிய வானிலை ஆய்வுத் துறை (MetMalaysia) இன்று அறிவித்துள்ளது.
இந்த நடவடிக்கை, நாட்டின் தேசிய நிலநடுக்க அபாய மதிப்பீட்டைப் புதுப்பிக்கும் முயற்சியின் ஒரு பகுதியாகும். இதன் பிரதான நோக்கம், பேரிடர் தயார்நிலையையும் பொதுப் பாதுகாப்பையும் வலுப்படுத்துவதாக MetMalaysia தெரிவித்துள்ளது.
அடையாளம் காணப்பட்ட பகுதிகளில் பெரும்பாலானவை சபா, சரவாக் மற்றும் தீபகற்ப மலேசியாவின் சில பகுதிகளில் உள்ளதாகவும், இங்கு கடந்த சில ஆண்டுகளில் சிறிய அளவிலான நில அதிர்வுகள் பதிவாகியுள்ளன என்றும் கூறப்பட்டுள்ளது.
இதனால், ஆய்வின் மூலம் மேம்பட்ட கண்காணிப்பு, ஆரம்ப எச்சரிக்கை அமைப்புகள், மற்றும் நிலநடுக்கம் ஏற்படும் வாய்ப்புள்ள இடங்களில் கட்டுமானத் தரநிலைகளை கடுமையாகப் பின்பற்றுவது அவசியம் என MetMalaysia வலியுறுத்தியுள்ளது.
மேலும், நில அதிர்வுகளை விரைவாகக் கண்டறிந்து, உடனடி நடவடிக்கை எடுக்கும் மலேசியாவின் திறனை மேம்படுத்த புதிய தொழில்நுட்பங்கள் மற்றும் சென்சார்கள் தொடர்ந்து இணைக்கப்படுவதாகவும் பொதுமக்களுக்கு உறுதியளிக்கப்பட்டுள்ளது.
