கோலாலம்பூர்:
மலாக்கா மாநில ஆளுநர் துன் டாக்டர் முகமட் அலி முகமட் ருஸ்தாமின் பிறந்தநாளை முன்னிட்டு, கல்வி அமைச்சர் ஃபட்லினா சித்திக் உட்பட 1,328 பேருக்கு மலாக்கா மாநில விருதுகள், பட்டங்கள் மற்றும் பதக்கங்கள் அறிவிக்கப்பட்டுள்ளன.
இதில் கல்வி அமைச்சர் ஃபட்லினா சித்திக் ‘டத்தோ ஸ்ரீ’ பட்டத்தை வழங்கும் தர்ஜா கெமிலாங் ஸ்ரீ மலாக்கா (DGSM) விருதைப் பெறுகிறார்.
அதேநேரம் மலாயா தலைமை நீதிபதி டத்தோ ஸ்ரீ ஹாசிம் ஹம்சா, அரச மலேசியப் போலிஸ் படைத் தலைவர் (IGP) டான் ஸ்ரீ முகமட் காலித் இஸ்மாயில், மலேசிய ஊழல் தடுப்பு ஆணையத்தின் (MACC) தலைமை ஆணையர் டத்தோ ஸ்ரீ அப்ட் ஹாலிம் அமான் மற்றும் அரச மலேசிய விமானப் படைத் தலைவர் ஜெனரல் டான் ஸ்ரீ முகமட் நோரஸ்லான் அரிஸ் ஆகியோரும் ‘டத்தோ ஸ்ரீ’ பட்டத்தை பெறுகின்றனர்.
மேலும் ‘டத்தோ வீரா’ பட்டத்தை வழங்கும் தர்ஜா செமர்லாங் ஸ்ரீ மலாக்கா (DCSM) விருது 56 பேருக்கு வழங்கப்படுகிறது. இதில் புக்கிட் அமான் குற்றப் புலனாய்வுத் துறை இயக்குநர் டத்தோ வீரா எம். குமார் மற்றும் மலாக்கா போலிஸ் தலைவர் டத்தோ வீரா சுல்கைரி முஹ்தார் ஆகியோர் இடம்பெற்றுள்ளனர்.
அத்தோடு ‘டத்தோ’ பட்டத்தை வழங்கும் தர்ஜா பாங்குவான் ஸ்ரீ மலாக்கா (DPSM) விருது 189 பேருக்கு வழங்கப்படுகிறது. இதில் மெர்லிமாவைப் பூர்வீகமாகக் கொண்ட பிரபல மலேசியப் பாடகி ஜியானா ஜைன் (Ziana Zain – Siti Roziana Zain) மற்றும் மீடியா பிரைமா டிவி நெட்வொர்க்ஸ் செய்தித் துறைப் பொது ஆசிரியர் டத்தோ அஸஹாரி முஹிதீன் ஆகியோருக்கு ‘டத்தோ’ பட்டம் வழங்கப்பட்டு கௌரவிக்கப்பட்டுள்ளது.
மலாக்கா மாநிலத்தின் வளர்ச்சி, சமூக நலன் மற்றும் பல்வேறு துறைகளில் சிறப்பாகப் பணியாற்றியவர்களைக் கௌரவிக்கும் வகையில் இந்த விருதுகள் வழங்கப்படுவதாக மாநிலச் செயலாளர் டத்தோ வீரா சல்ஹா சாலே தெரிவித்தார்.
மொத்தம் 3 கட்டங்களாக நடைபெறும் இவ்விழாவின் முதல் கட்ட முதலீட்டு விழா இன்றைக்கும், எஞ்சிய 2 மற்றும் 3-ஆம் கட்ட விழாக்கள் புதன்கிழமையும் நடைபெறும்.
