ஜார்ஜ்டவுன், நவம்பர் 4 :
நேற்றிரவு பினாங்கில் மாநிலம் தழுவிய ‘Ops Mabuk’ நடவடிக்கையின் போது சுமார் 1,072 நபர்கள் சோதனை செய்யப்பட்டனர் மற்றும் ஆறு பேர் கைது செய்யப்பட்டனர்.
இந்த நடவடிக்கையின் போது, சுமார் 945 வாகனங்கள் ஆய்வு செய்யப்பட்டு 240 பேருக்கு அபராதம் வழங்கப்பட்டது.
வடகிழக்கு, தென்மேற்கு, செபராங் பிராய் உத்தாரா, செபராங் பிராய் தெங்கா மற்றும் செபராங் பிராய் செலாடன் ஆகிய ஐந்து மாவட்டங்களிலுள்ள ஏழு இடங்களில் போலீஸார் சாலைத் தடுப்புகளை அமைத்துள்ளதாக பினாங்கு மாநில காவல்துறைத் தலைவர் டத்தோ முகமட் ஷுஹைலி முகமட் ஜைன் தெரிவித்தார்.
இன்று அதிகாலை 4 மணியுடன் முடிவடைந்த ஐந்து மணி நேர நடவடிக்கை தீபாவளி கொண்டாட்டத்துடன் இணைந்து நடத்தப்பட்டதாக அவர் கூறினார்.
குடிபோதையில் வாகனம் ஓட்டியதற்காக சாலை போக்குவரத்து சட்டம் 1987 இன் பிரிவு 45A இன் கீழ் 6 நபர்களை நாங்கள் கைது செய்தோம்.
“அது தவிர, பல்வேறு போக்குவரத்து குற்றங்களுக்காக 240 சம்மன்கள் வழங்கப்பட்டன,” என்று அவர் இன்று பினாங்கு காவல்துறையின் அதிகாரப்பூர்வ முகநூல் பக்கத்தில் வெளியிட்ட ஒரு பதிவில் தெரிவித்தார்.
மாநிலங்களுக்கு இடையேயான பயணத் தடையை அரசாங்கம் நீக்கிய பிறகு, ‘Ops Mabuk’ மூலம் கைது செய்யப்பட்டவர்களின் எண்ணிக்கை அதிகரித்துள்ளதாக முகமட் ஷுஹைலி கூறினார்.
அக்டோபர் 11 ஆம் தேதி முதல் செவ்வாய்க்கிழமை (நவம்பர் 2) வரை மொத்தம் 47 பேர் கைது செய்யப்பட்டுள்ளனர்.
“ஆனால் செப்டம்பர் 20 ஆம் தேதி முதல் அக்டோபர் 10 ஆம் தேதி வரை, 18 பேர் மட்டுமே கைது செய்யப்பட்டனர்,” என்று அவர் மேலும் கூறினார்.
