ஜோகூர் ஜெயாவின் தாமான் மோலெக்கில் இன்று காலை அவரது பள்ளிக்கு முன்னால் 13 வயது சிறுமியை ஒரு நபர் காரில் ஏற்றிச் சென்றார். காலை 6.50 மணியளவில் நடந்த இச்சம்பவத்தில் சிறிது தூரத்தில் வாகனத்தின் உள்ளே இழுக்க முயற்சித்தபோது சாதுரியமாக அம்மாணவி தப்பித்தார். பாதிக்கப்பட்ட பெண் தப்பிப்பதற்கு முன் சுமார் 400 மீட்டர் தூரத்திற்கு காரில் இழுத்து செல்லப்பட்டதாக ஶ்ரீ ஆலம் மாவட்ட காவல்துறைத் தலைவர் முகமட் சோஹைமி இஷாக் தெரிவித்தார்.
சமூக ஊடகங்களில் வைரலான கடத்தல் முயற்சி சம்பவம் குறித்து காவல்துறைக்கு ஒரு புகார் கிடைத்தது. பாதிக்கப்பட்ட சிறுமி தனது பள்ளி வேனில் இருந்து கீழே இறங்கிய பிறகு, பெரோடுவா கஞ்சில் காரை ஓட்டி வந்த ஒரு நபர், பள்ளிக்கு ஒரு படிவத்தை வழங்குமாறு கேட்டுக்கொண்டார் என்பது விசாரணையில் கண்டறியப்பட்டது.
பின்னர் அந்த நபர் பாதிக்கப்பட்ட பெண்ணை காரில் ஏறச் சொன்னார். ஆனால் அவர் மறுத்துவிட்டார். பாதிக்கப்பட்ட பெண்ணை வாகனத்தில் இழுத்துச் செல்ல சந்தேக நபர் முயற்சித்தார். ஆனால் சம்பவம் நடந்த இடத்திலிருந்து சுமார் 400 மீ தொலைவில் சிறுமி தப்பிப்பதற்குள் சந்தேக நபர் காரை ஓட்டிச் சென்றார் என்று அவர் இன்று ஒரு அறிக்கையில் தெரிவித்தார்.
பின்னர் சிறுமி பொதுமக்களின் உதவியை நாடியதாகவும், தனக்கு எந்த காயமும் ஏற்படவில்லை என்றும் அவர் கூறினார். சந்தேக நபரைக் கண்டுபிடிப்பதற்காக போலீசார் மேலதிக விசாரணைகளை முன்னெடுத்து வருவதாகவும் அவர் மேலும் தெரிவித்தார். அவரைப் பொறுத்தவரை, கடத்தல் குற்றவியல் சட்டத்தின் 363ஆவது பிரிவின் கீழ் இந்த வழக்கு விசாரிக்கப்பட்டு வருவதாகவும், குற்றம் நிரூபிக்கப்பட்ட எவருக்கும் ஏழு ஆண்டுகள் வரை சிறைத்தண்டனையும் அபராதமும் விதிக்கப்படலாம்.
