பட்டர்வொர்த், டிசம்பர் 15 :
பினாங்கு மாநில சுகாதாரத் துறையின் (JKNPP) உணவுப் பாதுகாப்பு மற்றும் தரப் பிரிவினர் (BKKM) RM875,000 மதிப்புடைய 125 தண்ணீர் விற்பனை இயந்திரங்களை (MJA) கைப்பற்றியுள்ளதாக JKNPP -BKKM சுகாதார அதிகாரி முகமட் வசீர் காலிட் தெரிவித்தார்.
செவ்வாய்க்கிழமை தொடங்கி இரண்டு நாட்கள் மேற்கொள்ளப்பட்ட ஓப் சீடா (Op Sita) நடவடிக்கை மூலம் இவை பறிமுதல் செய்யப்பட்டன.மேலும் கடந்த இரண்டு வாரங்களாக இயந்திரங்கள் தொடர்பாக கண்காணிப்பு பணியை மேற்கொண்ட பின்னரே, இந்த நடவடிக்கை மேற்கொள்ளப்பட்டது.
“உரிமம் இல்லாமல் செயல்படுதல், மருத்துவ உரிமைகோரல்கள் அல்லது நீரில் ஆரோக்கியத்தின் செயல்திறனைக் கோருதல், வணிகங்களுக்குப் பதிலாக உள்நாட்டு ஆதாரங்களைப் பயன்படுத்துவதாக நம்பப்படும் நீர் மற்றும் மின்சார ஆதாரங்களைப் பயன்படுத்துதல் மற்றும் சந்தேகத்திற்கிடமான ஹலால் முத்திரைகள் உட்பட பல்வேறு குற்றங்கள் கண்டறியப்பட்டன.
“அதுமட்டுமின்றி, இந்த நீர் இயந்திரத்தில் ஹலால் முத்திரை பயன்படுத்தப்பட்டதில் எங்களுக்கு சந்தேகம் உள்ளது, இது மலேசிய இஸ்லாமிய மேம்பாட்டுத் துறையிடமிருந்து (ஜாகிம்) பெறப்பட்டதா அல்லது சந்தைப்படுத்தல் நோக்கங்களுக்காக மட்டுமே பயன்படுத்தப்பட்டதா என்பதை உறுதிப்படுத்த முடியவில்லை,” என்று அவர் கூறினார்.
உணவுச் சட்டம் 1983 இன் பிரிவு 4 (1) (f) இன் கீழ், உணவு ஒழுங்குமுறைகள் 1985 இன் 360C (4) விதியின் கீழ் இவை பறிமுதல் செய்யப்பட்டது என்று அவர் விளக்கினார்.
” இந்த தண்ணீர் விற்பனை இயந்திரங்களை செயல்பட அனுமதிக்கும் முன்னர், மலேசிய சுகாதார அமைச்சகத்தின் (MOH) இயக்குநரிடம் அனுமதி பெற வேண்டும்.
ஏனெனில், உரிமம் இல்லாமல் இயங்கும் இயந்திரங்களில் இருந்து தண்ணீர் குடிக்கும் பொதுமக்களுக்கு அது விஷமாகி உயிரிழப்பை ஏற்படுத்துவதை நாங்கள் விரும்பவில்லை, என்றார்.
அவரைப் பொறுத்தவரை, இதுவரை தண்ணீர் விற்பனை இயந்திரங்களை தொடர்பாக மரணம் மற்றும் பாதிப்பு எதுவும் பதிவாகவில்லை, ஆனால் எதிர்பாராத விதமாக விஷயங்கள் நடக்கக்கூடாது என்பதற்காக, தடுப்பு நடவடிக்கையாக இதனை நாம் மேற்கொண்டோம் என்றார்.
“அனுமதி பெற்ற தண்ணீர் விற்பனை இயந்திரங்களில் குறிப்பிடப்பட்டுள்ள குறியீடுகள் தொடர்பில், அவர்கள் பயன்படுத்த விரும்பும் இயந்திரத்தை முதலில் சரிபார்க்குமாறு பொதுமக்களுக்கு அறிவுறுத்துகிறோம்,” என்று அவர் கூறினார்.
“இந்த தண்ணீர் விற்பனை இயந்திரங்களின் உரிமையாளருக்கான அடுத்த நடவடிக்கைக்காக, அவர்களை அருகிலுள்ள சுகாதார அலுவலகத்திற்கு வருவதற்கு 14 நாட்கள் அவகாசம் வழங்குவோம் என்றார்.
“மூன்று மாதங்களுக்குப் பிறகும் அவர்கள் அவ்வாறு செய்யத் தவறினால், நாங்கள் குற்றப்பத்திரிகையைத் திறந்து, கைப்பற்றப்பட்ட அனைத்து இயந்திரங்களையும் அப்புறப்படுத்த நீதிமன்றத்தில் விண்ணப்பம் செய்வோம்,” என்று அவர் கூறினார்.
