ஈப்போ, ஜனவரி 16 :
இங்குள்ள லாலுவான் சுங்கை பாரி 12, புந்தோங்கில் உள்ள ‘கச்சாங் பூத்தே’ பதப்படுத்தும் கடை இன்று அதிகாலை தீயில் எரிந்து நாசமானது.
டிஎன்எஸ் கச்சாங் பூத்தே வளாகத்தின் உரிமையாளர் டி சங்கர்லிங்கம், 52, தனது கச்சாங் பூத்தே கடை வளாகம், இன்று அதிகாலை தீயில் எரிந்து நாசமானது தொடர்பில் கூறுகையில், “தைப்பூசம் மற்றும் சீனப் புத்தாண்டு கொண்டாட்டங்களுக்காக வாடிக்கையாளர்கள் ஆர்டர் செய்த கச்சாங் பூத்தே தின்பண்டங்கள் அனைத்தும் தீயில் கருகி, மீட்க முடியாமல் போனது, மிகவும் வருத்தமாக உள்ளது.”
கடந்த 30 ஆண்டுகளாக தான் இந்த வியாபாரத்தை நடத்தி வருவதாகவும், அவரும் அவரது மகன் எஸ்.சதீஸ் குமாரும் (30) நேற்று நள்ளிரவு 12.30 மணியளவில் வாடிக்கையாளர் ஆர்டர் பணியை அந்த வளாகத்தில் முடித்ததாகக் கூறினார்.
“அரை மணி நேரம் கழித்து, பக்கத்து வீட்டுக்காரர் என் மகனை அழைத்தார், அவர் தீப்பொறிகளைப் பார்த்தார், கடைக்குள் வெடிப்புச் சத்தம் கேட்டது, உடனே அவர்கள் (அண்டை வீட்டுக்காரர் மற்றும் மகன்) தீயணைப்புத் துறைக்கு அழைத்தனர்.
“நானும் எனது மகனும் தீயை அணைக்கும் கருவியைப் பயன்படுத்தி தீயை அணைக்க முயற்சித்தோம், ஆனால் தீ மோசமாகி வருவதால் அதைக் கட்டுப்படுத்த முடியவில்லை,” என்று கூறினார்.
இதன் மூலம் 80,000 வெள்ளி முதல் 300,000 வெள்ளி வரை மதிப்புள்ள சமையல் பாத்திரங்கள் மற்றும் சிற்றுண்டிகளின் பேக்கேஜிங் அனைத்தும் தீயில் எரிந்து நாசமானதாகவும், அவருக்கு ஏற்பட்ட மொத்த இழப்பு 1 மில்லியன் வெள்ளிக்கும் அதிகமாக இருக்கும் என்றும் அவர் கூறினார்.
பேராக் தீயணைப்பு மற்றும் மீட்புத் துறை செய்தித் தொடர்பாளர் இதுபற்றிக் கூறுகையில், கடையைத் தவிர, அதன் அருகிலிருந்த ஒரு இரட்டை மாடி வீட்டின் ஒரு பகுதியும், அருகில் நிறுத்தப்பட்டிருந்த ஒரு வேன் மற்றும் மோட்டார் சைக்கிள் ஆகியவையும் தீயில் சேதமடைந்தன.
எனினும், உயிர்ச்சேதம் எதுவும் ஏற்படவில்லை என அவர் தெரிவித்தார்.
“40×80 அடி கடையில் 90 விழுக்காடு எரிந்து நாசமானது, வீடு (30%) , வேன் (5%) மற்றும் மோட்டார் சைக்கிள்(40%) எரிந்தன” என்று அவர் இன்று ஒரு அறிக்கையில் தெரிவித்தார்.
செய்தித் தொடர்பாளர் மேலும் கூறுகையில், ஈப்போ, மேரு ராயா மற்றும் பாசீர் பூத்தே ஆகிய தீயணைப்பு நிலையங்களிலிருந்து பணியாளர்களை சம்பவ இடத்திற்கு அனுப்புவதற்கு முன், அதிகாலை 1.08 மணிக்கு தீ விபத்து குறித்து தமது திணைக்களத்திற்கு தகவல் கிடைத்தது என்றார்.
அவர்களுக்கு பாசீர் பிஞ்சி, மெங்லெம்பு மற்றும் பெக்கான் பாரு தன்னார்வ தீயணைப்புப் படை உறுப்பினர்கள் உதவினர், தீயை அணைக்கும் நடவடிக்கை அதிகாலை 4.15 மணிக்கு முடிவடைந்ததாக அவர் மேலும் கூறினார்.
