கோத்தா பாரு, ஆகஸ்ட் 14 :
2015 ஆம் ஆண்டு ஒரு நிறுவனத்திடம் இருந்து RM10,000 லஞ்சம் வாங்கியதாக ஆயிர் கிளாந்தான் நிறுவனஹத்தின் முன்னாள் பொது மேலாளர் மீது இன்று செஷன்ஸ் நீதிமன்றத்தில் குற்றம் சாட்டப்பட்டது.
எவ்வாறாயினும், நீதிபதி ஜமான் முகமட் நூர் முன்னிலையில் குற்றஞ்சாட்டப்பட்ட வான் முகமட் ஜம்ரி வான் இஸ்மாயில், 61, என்வர் மீதான குற்றச்சாட்டு வாசிக்கப்பட்ட பின்னர், அவர் தான் குற்றமற்றவர் என்று கூறி விசாரணை கோரினார்.
ஜனவரி 22, 2015 அன்று, ஜாலான் மஹ்மூட், மே பேங்க் அருகே, இங் டிசே வெய் என்பவரிடமிருந்து, ஜனவரி 21, 2015 தேதியிட்ட யுனைடெட் ஓவர்சீ பேங்க் (மலேசியா) பிஎச்டி காசோலை மூலம் லஞ்சம் வாங்கியதாக குற்றம் சாட்டப்பட்டது, இந்த காசோலை அவரது மேபேங்க் இஸ்லாமிக் கணக்கில் வரவு வைக்கப்பட்டது.
மெர்பாவ் சோண்டோங் நீர் வழங்கல் திட்டம் இரண்டாம் கட்டம், கிளாந்தானில் உள்ள மச்சாங்கில் தொகுப்பு 1 க்கான வடிவமைப்புடன் தொடர்புடைய வேலைகளுக்கு துணை ஒப்பந்தக்காரராக Zog டெக்னாலஜி நிறுவனம் நியமிக்கப்படுவதற்கு இந்தப் பணம் ஒரு தூண்டுதலாக இருந்தது எனக் கூறப்பட்டது.
மலேசிய ஊழல் எதிர்ப்புச் சட்டம் 2009 (சட்டம் 694) பிரிவு 16 (a) (A) இன் கீழ் இந்தக் குற்றச்சாட்டு முன்வைக்கப்பட்டது மற்றும் அதே சட்டத்தின் பிரிவு 24 (1) இன் கீழ் தண்டிக்கப்படலாம், இது குற்றம் நிரூபிக்கப்பட்டால் 20 ஆண்டுகளுக்கு மிகாமல் சிறைத்தண்டனை மற்றும் லஞ்சத்தின் ஐந்து மடங்குக்குக் குறையாத அபராதம் அல்லது RM10,000, அல்லது எது அதிகமோ அது விதிக்கப்படலாம்.
மலேசிய ஊழல் தடுப்பு ஆணையத்தின் துணை அரசு வக்கீல் மரியா ஓமர் வழக்கு தொடர்ந்தார், குற்றம் சாட்டப்பட்டவர் சார்பில் வழக்கறிஞர் அஹ்மட் அதா அமீர் யாசர் அம்ரி ஆஜரானார்.
இவ்வழக்கில் அவரது கடவுச்சீட்டை நீதிமன்றத்தில் ஒப்படைக்குமாறும், வழக்கு முடிவடையும் வரை ஒவ்வொரு மாதமும் முதல் தேதியன்று அருகிலுள்ள காவல் நிலையம் அல்லது எம்ஏசிசி அலுவலகத்திற்கு புகாரளிக்க வேண்டும் என்பதோடு, ஒரு தனி நபர் உத்தரவாதத்துடன் RM7,000 பிணையை நீதிமன்றம் அனுமதித்தது.
மேலும் வான் முகமட் ஜம்ரி தனது மொபைல் எண் மற்றும் மின்னஞ்சல் முகவரியை எப்போதும் அறிவிக்க வேண்டும் என்றும் உத்தரவிடப்பட்டது.
வழக்கை நீதிமன்றம் செப்டம்பர் 28 ஆம் தேதிக்கு குறிப்பிடுவதற்காக ஒத்திவைத்தது.
