ஜார்ஜ் டவுன், செப்டம்பர் 9 :
26வது புத்தாக்கம் மற்றும் தொழில்நுட்பத்திற்கான உலக மாநாடு (WCIT) 2022 இற்கு வழி வகுக்கும் வகையில் பினாங்கில் பல சாலைகள் மூடப்படும் என்று பினாங்கு காவல்துறைத் தலைவர், டத்தோ முகமட் ஷுஹைலி முகமட் ஜைன் தெரிவித்தார்.
அதில் ஜாலான் துன் சையத் ஷே பராக்பா, லெபு டியூக் மற்றும் ஜாலான் பாடாங் கோத்தா லாமா ஆகிய சாலைகள் செப்டம்பர் 15 அன்று மாலை 5 மணி முதல் மூடப்படும் என்றார்.
செப்டம்பர் 13 முதல் 15 வரை நடைபெறும் இந்த உலக மாநாட்டின்போது சுமார் 4,000 பிரதிநிதிகளும், நிறைவு விழாவில் 7,000 பேரும் வருவார்கள் என்று எதிர்பார்க்கிறோம்.
“செத்தியா ஸ்பைஸ் மாநாட்டு மையம், கிழக்கு மற்றும் ஓரியண்டல் ஹோட்டல் மற்றும் எஸ்பிளனேட் ஆகியவை இவற்றுடன் சம்பந்தப்பட்ட இடங்களாகும்.
“திட்டத்தின் தொடக்கம், கண்காட்சி, உரையாடல் மற்றும் நிறைவு விழாவில் பங்கேற்க அனைத்துலக மற்றும் உள்ளூர் பிரதிநிதிகள் பினாங்கு மாநிலத்திற்கு வருவார்கள் என்று எதிர்பார்க்கப்படுகிறது,” என்று அவர் மேலும் கூறினார்.
நிகழ்வின் போது, செத்தியா ஸ்பைஸ் மாநாட்டு மையம் மற்றும் ஜார்ஜ் டவுனைச் சுற்றி போக்குவரத்து நெரிசல் ஏற்படும் என்று எதிர்பார்க்கப்படுகிறது என்றார்.
வடகிழக்கு மாவட்ட காவல் நிலையத்தில் இன்று வெள்ளிக்கிழமை (செப்டம்பர் 9) நடைபெற்ற செய்தியாளர் சந்திப்பின் போது, “பொதுமக்கள் முழு ஒத்துழைப்பை அளித்து, நெரிசலைத் தவிர்க்க மாற்றுச் சாலைகளில், தங்கள் பயணத்தைத் திட்டமிடுவார்கள் என்று நாங்கள் நம்புகிறோம்,” என்றார்.
