மெர்டேக்கா 118 கோபுரத்தின் உச்சியில் ஏறி வைரலான ரஷ்ய தம்பதியினர் வெளியேறி அல்லது நாட்டிற்குள் நுழைந்ததாக எந்த பதிவும் இல்லை என்று மலேசிய குடிவரவுத் துறை தெரிவித்துள்ளது. எவ்வாறாயினும், அதிகாரிகள் இந்த விஷயத்தை விரிவாக ஆராய்ந்து வருவதாக உத்துசான் மலேசியா தெரிவித்துள்ளது.
சந்தேக நபர்கள் இருவரும் நாட்டிற்குள் இல்லை என்பது சோதனையில் தெரியவந்துள்ளது. மேலும் அவர்கள் குடிவரவுத் திணைக்கள அமைப்பில் நுழைந்த அல்லது வெளியேறியதற்கான பதிவுகள் எதுவும் இல்லை என்பது புலனாய்வில் கண்டறியப்பட்டது என்று உத்துசான் மேற்கோள் காட்டிய ஒரு வட்டாரம் தெரிவித்தது.
அவர்கள் மலேசியாவுக்குள் சட்டவிரோதமாக நுழைவதற்கான சாத்தியக்கூறுகள் உள்ளிட்டவை குறித்து அதிகாரிகள் இன்னும் விசாரணையைத் தொடர்கின்றனர் என்று அந்த வட்டாரம் தெரிவித்தது.
கோபுரத்தில் உள்ள சிசிடிவி பகுப்பாய்வின் அடிப்படையில், இன்னும் செயல்படாத கட்டிடத்தின் மீது தம்பதியினர் அத்துமீறி நுழைந்ததற்கான காட்சிகள் எதுவும் இல்லை என்று ஆதாரம் தெரிவித்துள்ளது. வைரலான சம்பவத்திற்குப் பிறகு கோபுரத்தில் ஊழியர்கள் மற்றும் தொழிலாளர்கள் உட்பட ஒன்பது நபர்களை நாங்கள் அழைத்துள்ளோம் என்று அந்த வட்டாரம் தெரிவித்தது.
மேலும் கருத்து தெரிவிக்கையில், அந்த வீடியோ கிளிப் உண்மையானதா அல்லது உயர் தொழில்நுட்பத்தின் விளைவுதானா என்பதை தீர்மானிக்க சைபர் செக்யூரிட்டி மலேசியாவின் வீடியோ பகுப்பாய்வு முடிவுகளுக்காக அதிகாரிகள் காத்திருப்பதாகவும் அந்த வட்டாரம் தெரிவித்துள்ளது.
கடந்த வாரம், ஒரு ஜோடி SkyscraperCity.com என்ற இணையதளத்தில் மெர்டேக்கா 118 கோபுரத்தின் உச்சியில் இருக்கும் வீடியோ கிளிப்பைப் பதிவேற்றியதால் வைரலானது. வீடியோ கிளிப்பின் மூலம், தம்பதியினர் கோபுரத்தின் உள்ளே இருந்து படிக்கட்டுகளில் ஏறி உச்சியை அடைவதாகக் கூறிவிட்டு ட்ரோனைப் பயன்படுத்தி படம் எடுப்பதாக நம்பப்படுகிறது.
