மலாக்கா:
கடந்த வியாழக்கிழமை வங்கியிலிருந்து பணத்தை எடுத்துவிட்டு வெளியே வந்தபோது, அடையாளம் தெரியாத மூன்று நபர்களால் தாக்கப்பட்டதில் இராணுவ கார்ப்ரல் ஒருவருக்கு அவரது இடது மணிக்கட்டில் காயம் ஏற்பட்டுள்ளது.
வியாழக்கிழமை இரவு 9.30 மணியளவில் 31 வயதான பாதிக்கப்பட்ட இராணுவ வீரர், சுங்கை ஊடாங்கில் உள்ள ஒரு வங்கியிலிருந்து பணத்தை எடுத்துக்கொண்டு வெளியேவந்தபோது இந்த சம்பவம் நிகழ்ந்தது என்று தென் மலாக்கா காவல்துறைத் தலைவர்துணை ஆணையர் கிறிஸ்டோபர் பாடிட் கூறினார்.
பாதிக்கப்பட்டவரின் கூற்றுப்படி, அவர் தனது மோட்டார் சைக்கிளில் ஏறி அதன் இயந்திரத்தை இயக்கியபோது, அடையாளம் தெரியாத மூன்று நபர்கள் திடீரென்று அவரைத் தடுத்து, கத்தியால் வெட்டினர் என்றார்.
“பாதிக்கப்பட்டவர் தனது இடது கையில் கத்தியால் வெட்டப்பட்டதை உணர்ந்து தப்பிக்க முயன்றார். உடனே அங்குள்ள குடியிருப்பு பகுதிக்குள் நுழைந்து தப்பி ஓடினார் என்றும், வலியை பொருட்படுத்தாமல், பாதிக்கப்பட்டவர் தஞ்சம் அடையும் நோக்கத்தில் சுங்கை ஊடாங் காவல் நிலையத்தை நோக்கி ஓடினார்.
தாக்குதலின் காரணமாக, பாதிக்கப்பட்டவருக்கு இடது மணிக்கட்டில் எலும்பு முறிவு ஏற்பட்டு, தசைநார் துண்டிக்கப்பட்டது, இதனால் அவர் மலாக்கா மருத்துவமனையில் சிகிச்சை பெற்றார்.
தாக்குதலுக்குப் பின்னால் உள்ள நோக்கம் கொள்ளையல்ல, மாறாக கடன் பிரச்சினையுடன் தொடர்புடையது என காவல்துறை சந்தேகிக்கிறது. இருப்பினும், பாதிக்கப்பட்டவரின் பணம் உட்பட உடமைகள் எடுக்கப்படாததால் உண்மையான நோக்கத்தை நாங்கள் இன்னும் விசாரித்து வருகிறோம்,” என்று அவர் கூறினார்.
சந்தேக நபர்களை கண்டுபிடிப்பதற்கான முயற்சிகள் நடைபெற்று வருவதாகவும், சம்பவத்தை நேரில் பார்த்தவர்கள் அல்லது தகவல் அறிந்தவர்கள் அருகில் உள்ள காவல்நிலையத்திற்கு முன்வருமாறு காவல்துறை வலியுறுத்துவதாகவும் அவர் கூறினார்.
