ஜோகூர், கூலாயில் ஏற்பட்ட சாலை பழுதினால் நேற்று நடந்த விபத்தில் சிங்கப்பூர் சைக்கிள் ஓட்டுநர் ஒருவரின் உயிரைப் பறித்தது கண்டறியப்பட்டது. மாநில சாலை J165இல் ஏற்பட்ட சேதம் கனரக வாகனங்கள், குறிப்பாக அருகிலுள்ள குவாரிப் பகுதியிலிருந்து வரும் லோரிகளால் ஏற்பட்டிருக்கலாம் என்று பொதுப்பணி அமைச்சர் அலெக்சாண்டர் நந்தா லிங்கி கூறியதாக பெர்னாமா செய்தி வெளியிட்டுள்ளது.
சாலையை மேம்படுத்தும் பணிகள் இந்த ஆண்டு தொடக்கத்தில் மேற்கொள்ளப்பட்டாலும், அதிகப்படியான சுமைகள் சாலையை மீண்டும் சேதப்படுத்தியதாக நந்தா கூறினார்.
சாலை மாநில அரசாங்கத்தின் அதிகார வரம்பிற்குள் வந்தாலும், அதன் நிலை குறித்து பொதுபணி அமைச்சகம் கவலை கொண்டுள்ளது. இது மோட்டார் சைக்கிள் ஓட்டுநர்கள், சைக்கிள் ஓட்டுநர்கள் உட்பட சாலைப் பயனாளர்களுக்கு ஆபத்தை ஏற்படுத்துகிறது என்று அவர் இன்று ஒரு அறிக்கையில் தெரிவித்தார்.
ஜாலான் குனுங் பூலாயின் மோசமான நிலையில் ஏற்பட்ட விபத்தில் சிங்கப்பூர் சைக்கிள் ஓட்டுநர் ஒருவர் நேற்று காலை 9.45 மணியளவில் டிரெய்லர் லோரி மோதியதில் உயிரிழந்தார்.
உடனடி நடவடிக்கையாக, உயிர் காக்கும் பணிகள் உடனடியாக மேற்கொள்ளப்படுவதை உறுதிசெய்ய மாநில அதிகாரிகளைத் தொடர்பு கொண்டதாகவும், தேவையான ஒதுக்கீடு அங்கீகரிக்கப்பட்டவுடன் விரிவான பழுதுபார்ப்புகளைச் செய்யுமாறும் நந்தா கூறினார்.
சாலை பராமரிப்பில் ஈடுபட்டுள்ளவர்கள் சாலை நிலைமைகள் பயனர்களுக்கு பாதுகாப்பாக இருப்பதை உறுதி செய்யுமாறு அவர் வலியுறுத்தினார். கனரக வாகனங்கள் அடிக்கடி பயன்படுத்தும் பாதைகளைத் தவிர்க்குமாறும் நந்தா சைக்கிள் ஓட்டுநர்களுக்கு அறிவுறுத்தினார்.
வார இறுதி நாட்களில் அதிகாலை போன்ற பொருத்தமான மற்றும் பாதுகாப்பான நேரத்தைத் தேர்வு செய்யவும். ஹெல்மெட், பிரதிபலிப்பு விளக்குகள் உள்ளிட்ட பாதுகாப்பு உபகரணங்களை எப்போதும் பயன்படுத்துவதை உறுதி செய்யவும்.
போக்குவரத்து விதிமுறைகளைப் பின்பற்றுமாறும் சைக்கிள் ஓட்டும்போது மொபைல் போன்களைப் பயன்படுத்துவதைத் தவிர்க்கவும், உங்கள் சைக்கிள் நல்ல நிலையில் இருப்பதை உறுதி செய்யவும் என்று அவர் கூறினார். சைக்கிள் ஓட்டியவரின் குடும்பத்தினருக்கு அவர் தனது இரங்கலைத் தெரிவித்தார்.
