தேசிய கீதமான நெகாராகுவை கேலி செய்து அவமதித்ததாகக் கூறப்படும் வைரல் வீடியோ தொடர்பான விசாரணைகளுக்கு உதவ மலேசிய தொடர்பு மற்றும் மல்டிமீடியா ஆணையம் (MCMC), இரண்டு நபர்களிடமிருந்து வாக்குமூலங்களைப் பதிவு செய்துள்ளது. இன்று வெளியிடப்பட்ட MCMC அறிக்கையின்படி, சைபர்ஜெயாவில் உள்ள MCMC தலைமையகத்தில் நேற்று நடைபெற்ற வாக்குமூலப் பதிவு அமர்வின் போது இரு நபர்களிடமிருந்தும் ஒரு மொபைல் போன் மற்றும் ஒரு சிம் கார்டு பறிமுதல் செய்யப்பட்டது.
தேசிய கீதச் சட்டம் 1968 இன் பிரிவு 8 இன் படி, அனைத்து குடிமக்களும் தேசியக் கீதத்திற்கு மரியாதை வழங்கப்பட வேண்டும் என்றும் கேலி செய்யும் அல்லது சிறுமைப்படுத்தும் எந்தவொரு தரப்பினருடனும் MCMC சமரசம் செய்யாது என்று அந்த அறிக்கையில் கூறப்பட்டுள்ளது. நாட்டின் மீதான விசுவாசம் மற்றும் அன்பின் அடையாளமாக நெகாராகுவுக்கு எப்போதும் உரிய மரியாதை காட்டவும், தேசிய கீதத்திற்கு அவமரியாதை என்று பொருள் கொள்ளக்கூடிய எந்தவொரு செயல்களிலிருந்தும் விலகி இருக்கவும் MCMC பொதுமக்களுக்கு நினைவூட்டியது.
இந்த வழக்கு 1998 ஆம் ஆண்டு தகவல் தொடர்பு மற்றும் மல்டிமீடியா சட்டத்தின் பிரிவு 233 இன் கீழ் விசாரிக்கப்படுகிறது, இது குற்றம் நிரூபிக்கப்பட்டால் அதிகபட்சமாக RM500,000 அபராதம் அல்லது இரண்டு ஆண்டுகள் வரை சிறைத்தண்டனை அல்லது இரண்டும் விதிக்க வகை செய்கிறது.
