ஜோகூர் பாரு:
ஜோகூர் பாருவில் உள்ள சுல்தான் இஸ்கந்தர் கட்டிடம் (BSI) சுங்கம், குடிநுழைவு மற்றும் தனிமைப்படுத்தல் (CIQ) வளாகத்தில், பேருந்தில் ஏறும்போது தகராறு ஏற்பட்டதாகக் கூறப்படும் வீடியோ சமூக ஊடகங்களில் வைரலாகி வருகிறது.
இந்த சம்பவத்தில் ஒரு ஆணும் பெண்ணும் ஒருவருடன் ஒருவர் மோதிக்கொண்டதாக தெரிகிறது.
14 விநாடிகள் கொண்ட இந்த காட்சி நேற்று இரவு 11.50 மணியளவில் ஒரு பயனரால் பதிவேற்றப்பட்டது. மாண்டரின் மொழியில் “பேருந்தில் ஏறும்போது சண்டை” என்று விளக்கத்துடன் பதிவிடப்பட்ட இந்த வீடியோ பலரின் கவனத்தை ஈர்த்தது.
வீடியோவில், பேருந்துகள் நோக்கிச் செல்கின்ற வேலி அமைக்கப்பட்ட நுழைவாயிலருகே கூட்டம் சூழ, ஒரு ஆணும் பெண்ணும் தள்ளுமுள்ளான நிலைக்கு மாறும் காட்சி பதிவாகியுள்ளது.
இந்த சம்பவம் மலேசியா – சிங்கப்பூர் இடையேயான மிகப் பரபரப்பான நுழைவு-வெளியேறும் பகுதியில் இரவு நேரத்தில் நடந்ததாக நம்பப்படுகிறது.
இந்த காட்சி இணையத்தில் பரவியதும், சமூக ஊடக பயனர்கள் பல்வேறு எதிர்மறையான விமர்சனங்களை வெளியிட்டனர். குறிப்பாக பரபரப்பான நேரங்களில் இத்தகைய குழப்பங்கள் மற்றும் தகராறுகளைத் தவிர்க்க பயணிகள் இயக்க மேலாண்மையை மேம்படுத்த அதிகாரிகள் பணியில் இருக்க வேண்டும் என்று போக்குவரத்து நிறுவனங்களுக்கு அவர்கள் கோரிக்கை விடுத்துள்ளனர்.
ஜோகூர் பாரு தெற்கு மாவட்ட காவல்துறைத் தலைவர் உதவி ஆணையர் ரவூப் செலமாட் கூறுகையில், சம்பவம் தொடர்பாக இதுவரை போலீஸிடம் எந்தவொரு அதிகாரப்பூர்வ புகாரும் பதிவு செய்யப்படவில்லை.
“நேற்று மாலை 5.30 மணியளவில் சமூக ஊடக இணைப்பு மூலம் இந்த வைரல் காட்சியைப் பெற்றோம். சம்பவத்தில் தொடர்புடைய நபர்கள், சாட்சிகள் மற்றும் தகராறின் உண்மையான காரணத்தை கண்டறிய முயற்சி செய்து வருகிறோம்,” என்று அவர் தெரிவித்தார்.
அத்துடன், இந்த காட்சிகளை தொடர்ந்து பகிர வேண்டாம் என்றும், அது தேவையற்ற ஊகங்கள் மற்றும் தவறான புரிதல்களை ஏற்படுத்தி பொது நல்லிணக்கத்தை பாதிக்கக்கூடும் என்பதையும் அவர் எச்சரித்தார்.
