சிங்கப்பூர்:
இணையதளம் வாயிலாகப் பெண்களைத் தொடர்பு கொண்டு, தான் ஒரு செல்வந்தர் என்று பொய் கூறி ஏமாற்றி, அவர்களைக் கட்டாயப்படுத்தி பாலியல் வன்கொடுமை செய்த குற்றத்திற்காக மலேசியாவைச் சேர்ந்த ஜி.என். ரஜ்வந்த் சிங் (GN Rajwant Singh) என்பவருக்குச் சிங்கப்பூர் நீதிமன்றம் மிகக் கடுமையான தண்டனையை வழங்கியுள்ளது.
ரஜ்வந்த் சிங் டேட்டிங் செயலிகளில் (Dating Apps) தன்னை ‘மைக்’ (Mike) என்ற பெயருடைய ஐரோப்பிய இனத்தைச் சேர்ந்த செல்வந்தராக அடையாளப்படுத்திக் கொண்டார். தான் ஒரு சொகுசுப் படகில் (Yacht) வசிப்பதாகவும், தன்னிடம் அதிகப் பணம் இருப்பதாகவும் கூறிப் பெண்களைக் கவர்ந்தார்.
பெண்களிடம் நட்பு ரீதியாகப் பழகி, தன்னிடம் பழகினால் அதிகப் பணம் தருவதாக ஆசை காட்டினார். பின்னர் அவர்களைத் தனக்கு ஆபாசமான புகைப்படங்கள் மற்றும் வீடியோக்களை அனுப்பும்படி வற்புறுத்தினார்.
பெண்களை நேரில் சந்திக்க வேண்டும் என்று கூறி, அவர்களை மலேசியாவின் பினாங்கிற்கு (Penang) வரவழைத்தார்.
அவர்கள் பினாங்கிற்கு வந்ததும், அவர் ‘மைக்கின்’ கார் ஓட்டுநர் போல நடித்து அவர்களைச் சந்தித்தார். பிறகு, பெண்களின் ஆபாச வீடியோக்களை இணையத்தில் வெளியிட்டு விடுவதாக மிரட்டி, அவர்களைத் தன்னுடன் பாலியல் ரீதியாக உறவு கொள்ளக் கட்டாயப்படுத்தினார்.
பாதிக்கப்பட்ட பெண்களில் ஒருவரிடமிருந்து மட்டும் சுமார் S$183,000 (சுமார் RM576,000) பணத்தை அவர் மிரட்டிப் பறித்துள்ளார். 2018 முதல் 2020 வரையிலான காலகட்டத்தில் அவர் வேலையில்லாமல் இருந்தபோது, மலேசியாவில் தனது மனைவி மற்றும் குழந்தைகளுடன் வசித்துக் கொண்டே இந்தத் தொடர் குற்றங்களைச் செய்துள்ளார்.
இந்த வழக்கு தொடர்பான நான்கு குற்றச்சாட்டுகளில் ரஜ்வந்த் சிங் குற்றவாளி என உறுதி செய்யப்பட்டார். அவரது செயல்கள் “மிகவும் கொடூரமானவை மற்றும் வக்கிரமானவை” என்று அரசுத் தரப்பு வழக்கறிஞர் விவரித்தார்.
இதைத் தொடர்ந்து, அவருக்கு 12 ஆண்டுகள் சிறைத் தண்டனை மற்றும் 15 பிரம்படிகள் விதித்து நீதிமன்றம் உத்தரவிட்டது. இது தவிர, மற்றொரு மோசடி வழக்கில் அவருக்கு ஏற்கனவே 2025-இல் நான்கரை ஆண்டுகள் சிறைத் தண்டனை விதிக்கப்பட்டது குறிப்பிடத்தக்கது.
