கோலாலம்பூர், ஜனவரி 30:
மலேசியாவில் மின்-கழிவுகளைக் கையாள்வதில் நிகழ்ந்த ஊழல் மற்றும் அதிகார மீறல் குறித்த விசாரணையில், சுற்றுச்சூழல் துறையின் (Department of Environment) தலைமை இயக்குனர் மற்றும் துணை இயக்குனர் ஆகியோரை மலேசிய ஊழல் தடுப்பு ஆணையம் (MACC) நேற்று அதிரடியாகக் கைது செய்துள்ளது.
நேற்று மாலை சுமார் 6.30 மணியளவில், புத்ராஜெயாவில் உள்ள ஊழல் தடுப்பு ஆணையத்தின் தலைமையகத்தில் வாக்குமூலம் அளித்த பிறகு இருவரும் காவலில் எடுக்கப்பட்டனர்.
கடந்த சில ஆண்டுகளாக மின்-கழிவு மேலாண்மையில் அதிகாரத்தைத் தவறாகப் பயன்படுத்தியது மற்றும் லஞ்சம் பெற்றதாக இவர்கள் மீது குற்றச்சாட்டுகள் எழுந்துள்ளன.
“இந்த விவகாரத்தில் பதவிகளைப் பாராமல், ஊழலில் ஈடுபடுபவர்கள் மீது சமரசமின்றி கடும் நடவடிக்கை எடுக்கப்படும்,” என ஆணையத்தின் தலைமை ஆணையர் டான் ஸ்ரீ அஸாம் பாக்கி தெரிவித்துள்ளார்.
இந்த ஊழல் நெட்வொர்க்கைத் தகர்க்க ஊழல் தடுப்பு ஆணையம் மேற்கொண்டு வரும் தீவிர நடவடிக்கையில் (Op Nature) இதுவரை பல முக்கிய முன்னேற்றங்கள் ஏற்பட்டுள்ளன:
இதுவரை 16 வங்கி கணக்குகளில் இருந்த 10.2 மில்லியன் ரிங்கிட் ரொக்கம் முடக்கப்பட்டுள்ளது. மேலும் 87,000 ரிங்கிட் ரொக்கப் பணம் மற்றும் 220,000 ரிங்கிட் மதிப்பிலான வாகனங்கள், நகைகள் பறிமுதல் செய்யப்பட்டுள்ளன.
அமெரிக்கா, தைவான் போன்ற நாடுகளிலிருந்து கடத்தி வரப்பட்ட சுமார் 60-க்கும் மேற்பட்ட மின்-கழிவு கொள்கலன்கள் கண்டறியப்பட்டு சோதனையிடப்பட்டுள்ளன.
இயற்கை வளங்கள் மற்றும் சுற்றுச்சூழல் நிலைத்தன்மைத் துறை அமைச்சர் டத்தோ ஸ்ரீ ஆர்தர் ஜோசப் குருப், இந்த விசாரணைக்கு அமைச்சகம் முழு ஒத்துழைப்பு வழங்கும் என்றும், அதிகாரிகளின் இச்செயலால் சுற்றுச்சூழல் துறையின் அன்றாடப் பணிகள் பாதிக்கப்படாது என்றும் உறுதியளித்துள்ளார்.
