பச்சோக்:
பகாங் அல்-சுல்தான் அப்துல்லா பல்கலைக்கழக (UMPSA) மாணவர் ஒருவர் புனித குர்ஆனை அவமதித்து, அதன் மீது ஏறி நின்றதாகக் கூறப்படும் விவகாரத்தில், பல்கலைக்கழக விதிகளின்படி அவர் மீது கடுமையான நடவடிக்கை எடுக்கப்படும் என்று உயர்கல்வி அமைச்சர் டத்தோஸ்ரீ டாக்டர் ஜாம்ரி அப்துல் காதிர் தெரிவித்துள்ளார்.
மதம், இனம் மற்றும் அரச குடும்பம் (3Rs) சார்ந்த விவகாரங்களில் அவமதிப்பு செய்வதை அரசு ஒருபோதும் அனுமதிக்காது. அந்த மாணவரைப் பல்கலைக்கழகத்திலிருந்து நீக்க வேண்டும் என்ற கோரிக்கைகள் எழுந்துள்ள நிலையில், பல்கலைக்கழக விதிமுறைகளின்படி உரிய நடவடிக்கை எடுக்க உத்தரவிடப்பட்டுள்ளது.
இந்த விவகாரம் தொடர்பாக UMPSA நிர்வாகம் ஏற்கனவே காவல் நிலையத்தில் புகார் அளித்துள்ளது. தற்போது இது ஒரு குற்றவியல் வழக்காகப் போலீசாரால் விசாரிக்கப்பட்டு வருவதால், அவர்களின் அறிக்கைக்காக அமைச்சகம் காத்திருக்கிறது.
“இது போன்ற நாகரிகமற்ற செயல்களில் நாங்கள் சமரசம் செய்து கொள்ள மாட்டோம். இந்த விவகாரம் மேலும் வளர்ந்து சமூக மோதலுக்கு வழிவகுக்காமல் இருக்கத் தகுந்த நடவடிக்கை எடுக்கப்படும்,” என்று அமைச்சர் உறுதியளித்தார்.
பல்கலைக்கழகச் சமூகத்தினர் மற்றும் மாணவர்கள் மத்தியில் பரஸ்பர மரியாதையை வளர்க்க வேண்டியதன் அவசியத்தை அமைச்சர் வலியுறுத்தினார்.
“இஸ்லாமியர்களின் புனித நூலான குர்ஆனை அவமதிப்பது பொதுமக்களிடையே கடும் கோபத்தைத் தூண்டும். இதே போன்ற செயல் மற்ற மதங்களுக்கு எதிராக நடந்தாலும் அதை நாங்கள் சாதாரணமாக எடுத்துக்கொள்ள மாட்டோம்,” என்று அவர் கூறினார்.
நாட்டின் அமைதி மற்றும் ஸ்திரத்தன்மையைப் பேணிக் காக்க, அனைவரும் விவேகத்துடனும் நிதானத்துடனும் செயல்பட வேண்டும் என்று அவர் கேட்டுக்கொண்டார்.
இந்தச் சம்பவம் தொடர்பான வீடியோ சமூக வலைதளங்களில் பரவி பெரும் சர்ச்சையை ஏற்படுத்தியிருந்த நிலையில், அமைச்சரின் இந்த அறிவிப்பு முக்கியத்துவம் பெறுகிறது.
