கோலாலம்பூர் | மார்ச் 31, 2026
கோலாலம்பூர் பெட்ரோனாஸ் இரட்டைக் கோபுர (KLCC) பகுதியில் கடந்த மார்ச் 22-ஆம் தேதி நிகழ்ந்த வன்முறைச் சம்பவம் தொடர்பாகக் கைது செய்யப்பட்ட 18 புகைப்படக் கலைஞர்களில், மூன்று பேர் மீது இன்று நீதிமன்றத்தில் அதிகாரப்பூர்வமாகக் குற்றஞ்சாட்டப்பட்டது.
கைது செய்யப்பட்ட இந்த மூன்று நபர்களிடமும் இருந்த மலேசிய அடையாள அட்டைகள் (MyKad) போலியானவை என்பது தேசியப் பதிவுத் துறையின் (NRD) கைரேகை சோதனையில் உறுதி செய்யப்பட்டுள்ளது என்று, டாங் வாங்கி (Dang Wangi) மாவட்டப் போலீஸ் தலைவர் ஏ.சி.பி சசாலி ஆடம் (ACP Sazalee Adam) இன்று செய்தியாளர்களிடம் கூறினார்.
அவர்களின் உண்மையான அடையாளத்தை மலேசியக் குடியுரிமைப் பதிவேடுகளில் கண்டறிய முடியவில்லை. இதனால் அவர்கள் முறையான அடையாள ஆவணங்கள் இல்லாதவர்கள் எனக் கருதப்படுகின்றனர்.
இன்று நீதிமன்றத்தில் ஆஜர்படுத்தப்பட்ட அந்த மூவரும் தங்கள் மீதான குற்றச்சாட்டுகளை மறுத்து விசாரணை கோரியுள்ளனர். இதனைத் தொடர்ந்து, அவர்கள் மூவரையும் சுங்கை பூலோ சிறையில் (Sungai Buloh Prison) தடுப்புக் காவலில் வைக்க நீதிமன்றம் உத்தரவிட்டுள்ளது.
கடந்த மார்ச் 22-ஆம் தேதி KLCC பகுதியில் சுற்றுலாப் பயணியைத் தாக்கியதாக எழுந்த புகாரைத் தொடர்ந்து, அங்கு உரிமம் இன்றிப் புகைப்படம் எடுத்து வந்த 18 பேர் கைது செய்யப்பட்டனர். இவர்களில் சிலர் ஏற்கனவே வன்முறையில் ஈடுபட்டதற்காகக் குற்றஞ்சாட்டப்பட்ட நிலையில், தற்போது இந்த மூவர் போலி ஆவணங்களுக்காகச் சட்ட நடவடிக்கையைச் சந்தித்து வருகின்றனர்.
