ஷா ஆலம்:
காஜாங்கில் உள்ள அரசு முகமை பயிற்சி மையம் ஒன்றில், விழுந்த மரத்தை அகற்றும் பணியில் ஈடுபட்டிருந்த 34 வயது உள்ளூர் தொழிலாளி மின்சாரம் பாய்ந்து உயிரிழந்தார்.
கடந்த புதன்கிழமை மதியம் சுமார் 2:05 மணியளவில் இந்த விபத்து நிகழ்ந்துள்ளது. முந்தைய நாள் பெய்த பலத்த மழை மற்றும் காற்றினால் மரம் ஒன்று வேரோடு சாய்ந்து, பயிற்சி மையத்தின் வேலி மற்றும் அருகில் இருந்த கட்டுமானத் தளத்தின் வேலி மீது விழுந்தது.
பாதிக்கப்பட்ட தொழிலாளி ‘செயின்சாவ்’ (Chainsaw) கருவியைப் பயன்படுத்தி மரக்கிளைகளை அறுத்தபோது, எதிர்பாராதவிதமாக அவர் மீது மின்சாரம் பாய்ந்தது.
சிலாங்கூர் தொழில் பாதுகாப்பு மற்றும் ஆரோக்கியத் துறை (DOSH) நடத்திய முதற்கட்ட ஆய்வில் பின்வரும் தகவல்கள் கிடைத்துள்ளன: விபத்து நடந்த இடத்திற்கு அருகே மின்கம்பிகள் தொங்கிக் கொண்டிருந்தன. குறிப்பாக, கட்டுமானத் தளத்தின் வேலி மீது மின்கம்பிகள் உரசிக்கொண்டிருந்தன. பணியைத் தொடங்குவதற்கு முன்னதாக, ஒப்பந்ததாரர் அந்த இடத்தின் அபாயங்கள் குறித்து முறையான ஆய்வு (Risk Assessment) செய்யவில்லை என்பது தெரியவந்துள்ளது.
இந்தச் சம்பவம் தொடர்பாகத் தொழில் பாதுகாப்பு மற்றும் ஆரோக்கியச் சட்டம் 1994-இன் கீழ் விசாரணை தொடங்கப்பட்டுள்ளது. மேலும் விபத்து நடந்த இடத்தில் பணிகள் மேற்கொள்ளத் தற்காலிகத் தடை விதிக்கப்பட்டுள்ளது.
மின்சாரக் கசிவுக்கான துல்லியமான காரணத்தைக் கண்டறிய எரிசக்தி ஆணையத்திடம் (Energy Commission) தொழில்நுட்ப அறிக்கை கோரப்பட்டுள்ளது.
இந்த விபத்து குறித்து சம்பந்தப்பட்ட முதலாளி, ஒப்பந்ததாரர் மற்றும் சாட்சிகளிடம் DOSH அதிகாரிகள் தீவிர விசாரணை நடத்தி வருகின்றனர். மரம் முறிந்து விழும் காலங்களில் மின்சாரக் கம்பிகள் குறித்து எச்சரிக்கையாக இருக்க வேண்டும் என்று அதிகாரிகள் அறிவுறுத்தியுள்ளனர்.
