கோலாலம்பூர்:
தனது முன்னாள் கணவரின் கடனை அடைக்க ஆயிரக்கணக்கான ரிங்கிட் செலவு செய்த பின்னரும், கடன் சுறாக்களின் தொடர் மிரட்டலால் ஒரு பெண் நிர்வாகி பெரும் அச்சத்தில் வாழ்ந்து வருகிறார்.
யுயென் (Yuen, 50) என்று அறியப்படும் அந்தப் பெண், கடந்த ஆண்டு தனது கணவரை விவாகரத்து செய்துவிட்டார். இருப்பினும், இந்த மாத தொடக்கத்திலிருந்து அவரது முன்னாள் கணவர் வாங்கியதாகக் கூறப்படும் RM25,000 கடனைத் திருப்பிச் செலுத்துமாறு மர்ம நபர்கள் வாட்ஸ்அப் மூலம் மிரட்டல் விடுத்து வருகின்றனர்.
“எனது அடையாள அட்டை விவரங்கள் மற்றும் குடும்பப் புகைப்படங்களை அனுப்பி அவர்கள் என்னை மிரட்டுகின்றனர். என்னைப் பற்றிய அனைத்துத் தகவல்களும் அவர்களிடம் இருப்பதாகக் கூறுகின்றனர்.” என்று, நேற்று MCA பொதுச் சேவைகள் மற்றும் புகார்கள் துறையில் நடைபெற்ற செய்தியாளர் சந்திப்பில் யுயென் தெரிவித்தார்.
பள்ளிக்குச் செல்லும் தனது இரு குழந்தைகளுக்கும் ஆபத்து நேரிடும் என்றும், வீட்டிற்கே வந்து தாக்குவோம் என்றும் கடன் சுறாக்கள் எச்சரித்துள்ளதால் அவர் போலீசில் புகார் அளித்துள்ளார்.
முன்னாள் டாக்ஸி ஓட்டுநரான தனது முன்னாள் கணவர் தற்போது எங்கு இருக்கிறார் என்பது தமக்குத் தெரியாது என்றும் அவர் குறிப்பிட்டுள்ளார்.
கடன் வாங்கிய நபரின் 88 வயது முதிய தந்தையும் இந்த விவகாரத்தில் சிக்கியுள்ளார். கடந்த 2012-ஆம் ஆண்டிலிருந்தே தனது மகனின் கடன் தொல்லைக்காக அவர் உதவி தேடி வருகிறார். இதுநாள் வரை அந்த மகனின் குடும்பத்தினர் மற்றும் முன்னாள் மனைவி ஆகியோர் நகைகளை அடகு வைத்தும், சேமிப்பைத் தந்தும் மொத்தம் 1,76,000 ரிங்கிட் வரை கடனை அடைத்துள்ளனர்.
அந்த நபர் தொடர்ந்து கடன் சுறாக்களிடம் கடன் வாங்குவதையும், நிறுவனப் பணத்தைத் தவறாகப் பயன்படுத்துவதையும் வாடிக்கையாகக் கொண்டுள்ளார்.
இந்த ஆண்டு மட்டும் இதுவரை சுமார் 94 லட்சம் ரிங்கிட் மதிப்பிலான 34 கடன் சுறா புகார்கள் MCA-விடம் வந்துள்ளன என்று, MCA பொதுச் சேவைகள் மற்றும் புகார்கள் துறைத் தலைவர் டத்தோ ஸ்ரீ மைக்கேல் சோங் கூறினார்.
சட்டவிரோதக் கடன் வழங்குநர்களிடம் பொதுமக்கள் யாரும் கடன் வாங்க வேண்டாம் என்றும், அவ்வாறு மிரட்டல் விடுத்தால் உடனடியாக அதிகாரிகளை அணுகுமாறும் அவர் வலியுறுத்தினார்.
