கோலாலம்பூர்:
இல்லாத ஒரு போலி ஆன்லைன் முதலீட்டுத் திட்டத்தில் ஏமாந்து, அரசு உயர் கல்வி நிறுவனத்தைச் சேர்ந்த 50 வயது பெண் விரிவுரையாளர் ஒருவர் RM304,427.46 பணத்தை இழந்துள்ளதாகப் போலீசில் புகார் அளித்துள்ளார்.
கடந்த ஜனவரி 10-ஆம் தேதி பேஸ்புக்கில் (Facebook) அதிக லாபம் தருவதாகக் கூறி போடப்பட்ட விளம்பரம் ஒன்றை அந்தப் பெண் பார்த்துள்ளார். அதன் பிறகு, வாட்ஸ்அப் (WhatsApp) மூலம் அடையாளம் தெரியாத நபர் ஒருவரைத் தொடர்புகொண்டபோது, அவர் அந்த முதலீட்டுத் திட்டத்தில் சேருமாறு விரிவுரையாளரை வற்புறுத்தியுள்ளார் என்று பத்து பகாட் மாவட்ட காவல்துறைத் தலைவர் அசிஸ்டண்ட் கமிஷனர் ஷாருலானுவார் முஷாத்தத் அப்துல்லா சானி தெரிவித்தார்.
பாதிக்கப்பட்ட அந்தப் பெண், கடந்த ஜனவரி 19 முதல் பிப்ரவரி 14-ஆம் தேதிக்கு இடைப்பட்ட காலத்தில், 12 வெவ்வேறு வங்கிக் கணக்குகளில் மொத்தம் RM304,427.46 தொகையை வைப்புச் செய்துள்ளார் (Deposit).
தன் முதலீட்டுக் கணக்கில் காட்டிய RM116,069.50 லாபத் தொகையை அவரால் திரும்பப் பெற முடியாமல் போனபோதும், அவரது கணக்கு முடக்கப்பட்டபோதுமே தான் ஏமாற்றப்பட்டதை அவர் உணர்ந்துள்ளார். அதன் பின்னரே அவர் காவல் நிலையத்தில் புகார் அளித்துள்ளார்.
இச்சம்பவம் குறித்து, ஏமாற்றுதல் மற்றும் சொத்துக்களை ஒப்படைக்கச் செய்தல் ஆகிய குற்றங்களுக்கான தண்டனைச் சட்டம் பிரிவு 420 (Section 420 of the Penal Code)-இன் கீழ் போலீசார் விசாரித்து வருகின்றனர். இக்குற்றம் நிரூபிக்கப்பட்டால், 1 முதல் 10 ஆண்டுகள் வரை சிறைத்தண்டனை, பிரம்படி மற்றும் அபராதம் விதிக்கப்பட வாய்ப்புள்ளது.
அடையாளம் தெரியாத நபர்களுடன் நிதிப் பரிவர்த்தனைகளில் ஈடுபடும்போது பொதுமக்கள் எச்சரிக்கையுடன் இருக்குமாறு போலீசார் கேட்டுக்கொண்டுள்ளனர். சந்தேகத்திற்குரிய வங்கிக் கணக்குகளை ‘Semak Mule’ செயலி மூலம் சரிபார்க்கலாம்.
மோசடியில் சிக்கியவர்கள் உடனடியாக 997 என்ற எண்ணிற்கு அழைத்து தேசிய மோசடி மறுமொழி மையத்திடம் (National Scam Response Centre) புகார் அளிக்க அறிவுறுத்தப்படுகிறார்கள்.
