கோலாலம்பூர்:
மத்திய கிழக்கு நாடுகளில் நிலவும் போர் மோதல்களால் ஏற்பட்டுள்ள உலகளாவிய பொருளாதார மந்தநிலை மற்றும் உற்பத்தித் துறை வீழ்ச்சியை எதிர்கொள்ள, மலேசியாவிலுள்ள சிறு, நடுத்தர (MSME) நிறுவனங்களுக்கு உள்நாட்டு வங்கிகள் அவசரகால கடன் நிவாரணம் வழங்கி தங்களின் சமூகப் பொறுப்பை (CSR) நிலைநாட்ட வேண்டும் என பாகான் நாடாளுமன்ற உறுப்பினரும் முன்னாள் நிதியமைச்சருமான லிம் குவான் எங் வலியுறுத்தியுள்ளார்.
மலேசிய வங்கிகளின் ஒட்டுமொத்த வரிக்கு முந்தைய லாபம், கடந்த 2024-ஆம் ஆண்டில் 48.3 பில்லியன் ரிங்கிட்டாக இருந்த நிலையில், 2025-ஆம் ஆண்டில் அது 13.5 விழுக்காடு உயர்ந்து 54.8 பில்லியன் ரிங்கிட்டாக அதிரடி வளர்ச்சியைப் பெற்றுள்ளது என்பதை அவர் சுட்டிக்காட்டினார். வங்கிகள் ஈட்டியுள்ள இந்த பிரம்மாண்ட லாபத் தொகையைக் கொண்டு, நாட்டில் தவிக்கும் சுமார் 1.1 மில்லியன் உள்ளூர் நிறுவனங்களின் நிதிச் சுமையைக் குறைக்க முடியும் என அவர் கணக்கிட்டுக் கூறியுள்ளார்.
தற்போதைய இக்கட்டான பொருளாதாரச் சூழலில் இருந்து சிறு வணிகங்களைக் காக்க, வங்கிகள் பின்வரும் இரு முக்கிய சலுகைகளை உடனே வழங்க வேண்டும் என அவர் தனது அதிகாரப்பூர்வ அறிக்கையில் கேட்டுக்கொண்டார்:
நிலுவைக் கடன்கள்: சிறு, நடுத்தர நிறுவனங்கள் தற்போது பெற்றுள்ள கடன்களுக்கு 1 ஆண்டு வரை வட்டி விலக்கு (Interest Waiver) அளிக்கப்பட வேண்டும்.
புதிய கடன்கள்: சிறு வணிகர்கள் வாங்கும் முதல் 50,000 ரிங்கிட் வரையிலான புதிய கடன்களுக்கு வட்டி இல்லா சலுகை (0% Interest) வழங்கப்பட வேண்டும்.
“பிரதமர் டத்தோஸ்ரீ அன்வார் இப்ராகிம் வங்கிகளின் நலனைப் பாதுகாப்பதைத் தவிர்த்து, நாட்டின் ஒட்டுமொத்த பொருளாதார நலனைக் கருத்தில் கொண்டு, நலிவடைந்து வரும் சிறு வணிகங்களுக்கு வாரி வழங்க வங்கிகளை வற்புறுத்த வேண்டும்,” என லிம் குவான் எங் கேட்டுக்கொண்டார்.
எரிபொருள் மற்றும் மூலப்பொருட்களின் விலை உயர்வால் கடுமையாகப் பாதிக்கப்பட்டுள்ள சிறு தொழில்களைக் காப்பாற்ற, நாட்டின் நிதித்துறை மற்றும் நாணயக் கொள்கை (Monetary Policy) சார்ந்த அதிரடி நடவடிக்கைகளை மத்திய அரசு விரைந்து மேற்கொள்ள வேண்டும் என்றும் அவர் தனது அறிக்கையில் மேலும் குறிப்பிட்டுள்ளார்.
