கோலாலம்பூர்:
மலேசிய மலாய் திரைப்படத் துறையின் ஆரம்பக்கால வளர்ச்சிக்கு மிக முக்கியப் பங்காற்றிய தேசியத் திரைப்படப் பிரமுகரும், 2016-ஆம் ஆண்டின் மெர்டேக்கா விருது பெற்றவருமான டான்ஸ்ரீ எல். கிருஷ்ணன் தாய்லாந்தின் சியாங் மாய் நகரில் நேற்று (செப்டம்பர் 24) வியாழக்கிழமை காலமானார். இறக்கும் போது அவருக்கு வயது 104.
அவரது மறைவை தேசியத் திரைப்பட வளர்ச்சிக் கழகத்தின் (FINAS) தலைமைச் செயல் அதிகாரி டத்தோ அஸ்மீர் சைஃபுடீன் முத்தாலிப் அதிகாரப்பூர்வமாக உறுதிப்படுத்தினார்.
“மலேசியக் கலைஞர் சங்கத்திடமிருந்து கிடைத்த தகவலின்படி, வயது மூப்பின் காரணமாக உள்ளூர் நேரப்படி பிற்பகல் 2.15 மணிக்கு அவர் காலமானார்.
தாய்லாந்து பிரஜையான தன் மனைவியைத் திருமணம் செய்துகொண்ட பிறகு, அவர் நீண்டகாலமாகத் தாய்லாந்திலேயே வசித்து வந்தார். தற்போது அவரது இறுதிச் சடங்குகளுக்கான ஏற்பாடுகள் நடைபெற்று வருகின்றன” என்று டத்தோ அஸ்மீர் சைஃபுடீன் முத்தாலிப் கூறினார்.
மலேசியாவின் நவீனத் திரைப்படத் துறைக்கு அடித்தளமிட்டதோடு, மறைந்த கலைமாமணி டான்ஸ்ரீ பி. ராமலி உள்ளிட்ட ஆரம்பக்காலத் திரைத்துறைக் கலைத்திறமைகளைக் கண்டறிந்து வளர்த்தெடுத்ததற்காகக் கல்வி மற்றும் சமூகப் பிரிவின் கீழ் அவருக்கு 2016-ஆம் ஆண்டுக்கான மெர்டேக்கா விருது வழங்கி கௌரவிக்கப்பட்டது குறிப்பிடத்தக்கது.
