கோலாலம்பூர்:
கெடா, பாலிங் (Baling) மாவட்டத்தில் உள்ள தாவார் (Tawar) பகுதியில், கடந்த சில நாட்களாகப் பூட்டப்பட்ட நிலையில் நிறுத்தப்பட்டிருந்த புரோட்டான் வீரா (Proton Wira) காரின் முன்பக்கப் பயணியர் இருக்கையிலிருந்து அழுகிய நிலையில் மர்ம சடலம் ஒன்று இன்று மீட்கப்பட்டுள்ளது.
ஜாலான் ஜெராட் சினா (Jalan Jerat Cina) என்ற இடத்தில் நிறுத்தப்பட்டிருந்த அந்தக் காரில் இருந்து கடுமையான துர்நாற்றம் வீசியதைத் தொடர்ந்து இந்தத் துயரச் சம்பவம் வெளிச்சத்திற்கு வந்துள்ளது என்று, பாலிங் தீயணைப்பு மற்றும் மீட்பு நிலையத்தின் தலைவர் உதவி தீயணைப்பு கண்காணிப்பாளர் சுல்கைரி மாட் தான்ஜில் தெரிவித்துள்ளார்.
இன்று மதியம் சுமார் 12.15 மணியளவில் தீயணைப்புத் துறைக்குக் காரின் பூட்டை உடைத்து உதவி செய்யக் கோரி அவசர அழைப்பு வந்தது. அதன்பேரில் சம்பவ இடத்திற்கு விரைந்த தீயணைப்பு வீரர்கள், சிறப்பு உபகரணங்களைப் பயன்படுத்தி காரின் ஜன்னல் கண்ணாடியை உடைத்து, பூட்டப்பட்டிருந்த கதவுகளை அதிரடியாகத் திறந்தனர்.
காரின் முன்பக்கப் பயணியர் இருக்கையில் (Front Passenger Seat) உடல் முற்றிலும் அழுகிய நிலையில் ஒரு நபர் இறந்து கிடப்பது கண்டறியப்பட்டது.
அந்தப் பகுதியில் வசிக்கும் பொதுமக்கள் அளித்த தகவலின்படி, சம்பந்தப்பட்ட அந்தப் புரோட்டான் வீரா கார் கடந்த வியாழக்கிழமை (மே 21) முதலே அதே இடத்தில் நகராமல் நிறுத்தப்பட்டிருந்தது தெரியவந்துள்ளது. அத்தோடு காரைச் சுற்றி மிகக் கடுமையான தாள முடியாத துர்நாற்றம் வீசிய பிறகே, உள்ளே ஏதோ அசம்பாவிதம் நடந்துள்ளதை உணர்ந்து பொதுமக்கள் அதிகாரிகளுக்குத் தகவல் கொடுத்துள்ளனர்.
உயிரிழந்த நபர் யார், அவர் எந்த ஊரைச் சேர்ந்தவர் மற்றும் அவரது வயது போன்ற எந்தவொரு முதற்கட்ட விபரங்களும் இதுவரை கண்டறியப்படவில்லை. தீயணைப்புத் துறையினரின் இந்த மீட்பு நடவடிக்கை மதியம் 2.25 மணியளவில் நிறைவடைந்ததைத் தொடர்ந்து, சடலம் மற்றும் கார் ஆகியவை மேல் நடவடிக்கைக்காகப் போலீசாரிடம் ஒப்படைக்கப்பட்டன.
காரின் உள்ளே இருந்த நபர் தற்கொலை செய்து கொண்டாரா அல்லது அவர் கொலை செய்யப்பட்டு காரில் அடைக்கப்பட்டாரா என்பது உள்ளிட்ட பல்வேறு கோணங்களில் பாலிங் மாவட்டப் போலீசார் தற்போது தீவிர விசாரணையைத் முடுக்கிவிட்டுள்ளனர்.
