கோலாலம்பூர்: ஓராங் அஸ்லி மக்களிடையே டிஜிட்டல் தடுப்பூசி சான்றிதழ்கள் இல்லாததால், குறிப்பாக கிளந்தான், பேராக் மற்றும் பகாங் மாநிலங்களில் கிராமப்புற மக்கள் தங்கள் அன்றாட அலுவல்களைச் செய்வது மிகக்கடினமாக உள்ளது.
செனட்டர் டத்தோ ஈசா அப்துல் ஹமீத் இது பற்றிக்கூறியபோது, சுகாதார அமைச்சினால் (MOH) வழங்கப்பட்ட தடுப்பூசி அட்டைகள் சில வணிக வளாகங்கள் மற்றும் அரசு அலுவலகங்களில் ஏற்கப்படாததால் தான் ஓராங் அஸ்லியினர் இப்பிரச்சினையை எதிர் நோக்குகின்றனர் என்றார்.
“அவர்கள் முழுமையாக தடுப்பூசி போட்டுக்கொண்ட பின்னர், தங்களுக்கான தடுப்பூசி அட்டையைப் பெறுவார்கள், ஆனால் அவர்கள் சூப்பர் மார்க்கெட் அல்லது அரசு அலுவலகங்கள் மற்றும் வேறு துறைகளுக்குச் செல்லும்போது, அவர்களிடம் நுழைய அனுமதி இல்லை, ஏனெனில் அவர்களிடம் மைசேஜ்தேரா டிஜிட்டல் சான்றிதழ் இல்லை.
“இது ஓராங் அஸ்லி சமூகத்திற்கு ஏற்பட்டுள்ள ஒரு புதிய பிரச்சனை, அவர்கள் ஒரு மொபைல் போன் வாங்கி, ஆப்பில் பதிவு செய்ய விரும்புகிறார்கள் ஆனால் இணைய வசதி இல்லை” என்று நேற்று நாடாளுமன்றத்தில் நடந்த 12 வது மலேசிய திட்டம் (12 MP) பற்றி விவாதிக்கும்போது அவர் கூறினார்.
மேலும் ஓராங் அஸ்லி சமூகத்திற்கு தடுப்பூசி சான்றிதழ் வழங்க ஓராங் அஸ்லி மேம்பாட்டுத் துறைக்கு அனுமதி வழங்க வேண்டும் என்று ஈசா பரிந்துரைத்தார்.
முன்னதாக, செனட்டர் ஃபத்லினா சிடெக், சமூக மனநல சேவைகளுக்கான அணுகல் தொடர்பான சமூகத்தின் அனைத்துப் பிரிவுகளிலும் உள்ள ஏற்றத்தாழ்வுகளைக் குறைக்க, பொது சுகாதாரக் கொள்கையின் ஒரு முக்கிய பகுதியாக தேசிய மனநலக் கொள்கையில் தீவிர கவனம் செலுத்துமாறு அரசாங்கத்தைக் கேட்டுக் கொண்டார்.
நாடாளுமன்ற அமர்வு இன்றும் தொடர்கிறது.
– பெர்னாமா
