புத்ராஜெயா, அக்டோபர் 26:
நேற்று, இங்குள்ள Precinct 5 பகுதியில் உள்ள ஒரு அடுக்குமாடி குடியிருப்பின் ஏழாவது மாடியில் இருந்து விழுந்த 11 வயது சிறுமி உயிரிழந்தார்.
புத்ராஜெயா மாவட்ட காவல்துறைத் தலைவர், துணை ஆணையர் ஏ அஸ்மாதி அப்துல் அஜீஸ் இது பற்றிக் கூறுகையில் , சம்பவம் குறித்து காவல்துறைக்கு நேற்று மாலை 6.55 மணிக்கு தகவல் கிடைத்தது என்றும் 7 ஆவது மாடியிலிருந்து விழுந்ததாக நம்பப்படும் சிறுமி, புத்ராஜெயா மருத்துவமனையில் சிகிச்சை பெற்று வந்த நிலையில் சிகிச்சை பலனின்றி அவர் உயிரிழந்தது உறுதி செய்யப்பட்டது என்றார்.
மேலும், பாதிக்கப்பட்டவர் படுக்கையறையில் தனியாக இருந்தபோது அடுக்குமாடி குடியிருப்பின் ஏழாவது மாடியில் இருந்து வீழ்ந்தார் என்று நம்பப்படுகிறது. முதற்கட்ட விசாரணையில், சம்பவத்தின் போது, பாதிக்கப்பட்டவர் தனது 14 வயது சகோதரி மற்றும் ஏழு வயது சகோதரனுடன் வசித்து வந்ததாகவும், அவரது பெற்றோர் வேலைக்குச் சென்றிருந்ததாகவும் அவர் கூறினார்.
“பாதிக்கப்பட்டவர் விழுந்ததாக நம்பப்படும் அறைக்கதவு பூட்டப்பட்டிருந்தது என்றும் அந்த அறையில் உள்ள ஜன்னல் கம்பிகள் திறக்கப்பட்டிருந்தன, மேலும் ஜன்னல் கம்பிகளுக்கு பூட்டுகள் இல்லாமல் தாழ்ப்பாள் மட்டுமே இருந்தன, அதே நேரத்தில் வீட்டில் கண்காணிப்பு கேமரா (CCTV) எதுவும் பொருத்தப்பட்டிருக்கவில்லை,” என்று அவர் கூறினார்.
மாலை 6 மணியளவில் வேலை முடிந்து திரும்பிய பாதிக்கப்பட்டவரின் பெற்றோர், பாதிக்கப்பட்டவரின் அறை உள்ளே இருந்து பூட்டப்பட்டிருப்பதைக் கண்டதாக அஸ்மாடி கூறினார்.
அவர்கள் கூறியபடி, நகல் சாவியைக் கொண்டு கதவைத் திறந்த பிறகு, பாதிக்கப்பட்டவர் அறையில் இல்லை என்றும், அந்த அறையின் ஜன்னல்கள் மற்றும் ஜன்னல் கம்பிகள் திறந்திருக்கக் காணப்பட்டது.
பின்னர் பாதிக்கப்பட்டவரின் பெற்றோர் அடுக்குமாடி குடியிருப்பின் தரை தளத்திற்கு விரைந்ததாகவும், தனது மகன் தரையில் கிடப்பதைப் பார்க்க மக்கள் கூடிவந்ததைக் கண்டதாகவும் அவர்கள் கூறினார்கள் என்றார்.
நேற்று மாலை 6.45 மணியளவில் இவ்விபத்து குறித்து அறிவிப்பை பெற்ற தீயணைப்பு மற்றும் மீட்பு குழுவினர் (JBPM ) ஆபத்தான நிலையில் இருந்த பாதிக்கப்பட்டவருக்கு அவசர சிகிச்சை அளிக்கப்பட்டு, அவர் ஆம்புலன்ஸ் மூலம் புத்ராஜெயா மருத்துவமனைக்கு கொண்டு செல்லப்பட்டார்.
“பாதிக்கப்பட்டவரின் அறையில் மேற்கொண்ட பரிசோதனையின் முடிவுகளில் குற்றவியல் கூறுகள் எதுவும் கண்டறியப்படவில்லை, மேலும் மருத்துவரின் பரிசோதனையில் பாதிக்கப்பட்டவரின் முழங்கைகள் மற்றும் இடது கால் இரண்டும் உடைந்திருப்பது கண்டறியப்பட்டது, மேலும் பிரேத பரிசோதனை நடத்தப்பட்ட பிறகே இறப்புக்கான காரணம் தெரியவரும் ” என்றார்.
“மருத்துவமனையில் சிகிச்சை பெற்றுவந்த பாதிக்கப்பட்டவர் இரவு 7 மணியளவில் மருத்துவமனையில் இறந்தார், மேலும் இந்த வழக்கு திடீர் மரணம் என வகைப்படுத்தப்பட்டுள்ளது மற்றும் சம்பவத்தின் உண்மையான காரணத்தைக் கண்டறிய விசாரணைகள் இன்னும் நடந்து வருகின்றன” என்று அவர் கூறினார்.
