பிந்துலு, டிசம்பர் 26 :
இன்று அதிகாலை 1.36 மணியளவில் இங்குள்ள ஜாலான் துன் ஹுசைன் ஓன் என்ற இடத்தில், ஆடவர் ஓட்டிச் சென்ற நிசான் நவாரா வகை கார் சறுக்கி மின் கம்பத்தில் மோதியதில், மலேசிய இந்தியர் ஒருவர் உயிரிழந்தார் என்று சரவாக் போக்குவரத்து புலனாய்வு மற்றும் அமலாக்கத் துறையின் தலைமைக் கண்காணிப்பாளர் அலெக்ஸ்சன் நாகா சாபு கூறினார்.
அவர் கூறுகையில், தலை மற்றும் உடலில் பலத்த காயம் அடைந்து, சம்பவ இடத்திலேயே கதிர்வண்ணன் ரவிச்சந்திரா (27) என்ற ஆடவர் உயிரிழந்தார்.
இதற்கிடையில், இங்குள்ள ஜாலான் தஞ்சோங் கிடுரோங்கில் நேற்று இரவு நடந்த மற்றுமொரு சம்பவத்தில், ஆடவர் ஓட்டி வந்த கார் கட்டுப்பாட்டை இழந்து, பெரிய மரத்தில் மோதியதில் அவர் உயிரிழந்தார்.
இரவு 8.55 மணியளவில் இடம்பெற்ற இச்சம்பவத்தில், 22 வயதான ஜோஸ்டின் எண்டி அனாக் மிங்கு, என்பவரே தலையில் ஏற்பட்ட பலத்த காயம் காரணமாக சம்பவ இடத்திலேயே உயிரிழந்துள்ளார்.
பாதிக்கப்பட்டவர் தஞ்சோங் கிடுரோங்கில் இருந்து நகர மையத்திற்குச் சென்றதாக நம்பப்படுகிறது. அவர் பெரோடுவா பெஸ்ஸா வகை காரை ஓட்டிச் சென்றது ஆரம்ப விசாரணையில் கண்டறியப்பட்டது.
“அவர்கள் பிந்துலு கிடுரோங் கிளப்பின் முன்னால் உள்ள நேரான பாதையை அடைந்தபோது, பாதிக்கப்பட்டவர் ஓட்டிச் சென்ற கார் திடீரென கட்டுப்பாட்டை இழந்து சாலையோரத்தில் இருந்த பெரிய மரத்தில் மோதியது.
“பாதிக்கப்பட்டவர் தலையில் ஏற்பட்ட பலத்த காயம் காரணமாக சம்பவ இடத்திலேயே இறந்ததாக அங்கிருந்த மருத்துவ அதிகாரியால் உறுதிப்படுத்தப்பட்டது” என்று அவர் கூறினார்.
மேலும் மரத்தில் மோதிய கார் மோசமாக சேதமடைந்துள்ளது.
பலியான இருவரின் உடல்களும் பிரேத பரிசோதனைக்காக பிந்துலு மருத்துவமனையின் தடயவியல் பிரிவுக்கு அனுப்பி வைக்கப்பட்டதாக அவர் கூறினார்.
இரண்டு வழக்குகளும் சாலைப் போக்குவரத்துச் சட்டம் 1987 இன் பிரிவு 41 (1) இன் கீழ் விசாரிக்கப்படுகின்றன,” என்று அவர் கூறினார்.
