கிள்ளான், ஜனவரி 7 :
கடந்த புதன்கிழமை, மேருவில் உள்ள ஜாலான் ஜாபாரில் மதுபானத்தை காய்ச்சி, பதப்படுத்தி விற்பனை செய்யும் இடங்களாக சந்தேகப்படும் இரண்டு வீடுகளில் நடத்தப்பட்ட சோதனையில் 100,000 வெள்ளி மதிப்புள்ள 700க்கும் மேற்பட்ட போலி மதுபோத்தல்கள் போலீசாரால் பறிமுதல் செய்யப்பட்டன.
வடக்கு கிள்ளான் மாவட்ட காவல்துறை தலைமை உதவி ஆணையர் எஸ். விஜய ராவ் கூறுகையில், ஓப் கோன்ட்ராபன் மூலம் நடத்தப்பட்ட சோதனை நடவடிக்கையில், வடக்கு கிள்ளான் மாவட்ட காவல்துறை தலைமையகத்தின் குற்றப் புலனாய்வுப் பிரிவைச் சேர்ந்த அதிகாரிகள் மற்றும் காவல்துறை அதிகாரிகள் ஈடுபட்டுள்ளனர்.
தமது துறையினருக்கு கிடைத்த தகவலின்படி, புதன்கிழமை (ஜன.5) மாலை 4.20 மணியளவில் நடந்த சோதனையில், போலீசார் அந்த வளாகத்தை சோதனை செய்து, 21 வயது மியன்மார் நாட்டுப் பெண்ணை கைது செய்தனர்.
“சந்தேக நபர் அந்த வளாகத்தில் எழுத்தராக பணிபுரிவதாக நம்பப்படுகிறது மற்றும் அங்கு சம்பந்தப்பட்ட பொருட்களின் இருப்பு தொடர்பான எந்த அனுமதி ஆவணங்களையும் அவர் சமர்ப்பிக்கத் தவறினார்.
மேலும், அந்த வளாகத்தில் போலீசார் நடத்திய சோதனையில் பல்வேறு வகையான போலி மதுபானங்கள் இருப்பது கண்டுபிடிக்கப்பட்டது.
“போலி மதுபானம் விற்பனை செய்த பணம் என் நம்பப்படும் 1,066 வெள்ளி ரொக்கத்தையும் போலீசார் பறிமுதல் செய்தனர்,” என்று அவர் இன்று வடக்கு கிள்ளான் போலீஸ் தலைமையகத்தில் நடந்த செய்தியாளர் கூட்டத்தில் கூறினார்.
விசாரணையின் அடிப்படையில், பக்கத்திலுள்ள ஒரு வீட்டிலும் சோதனை மேற்கொள்ளப்பட்டது, மேலும் சந்தேகத்திற்குரிய போலி மதுபானங்கள் கொண்ட 20 அட்டைப்பெட்டிகள் மற்றும் அதன் செயலாக்க கருவிகள் ஆகியவையும் பறிமுதல் செய்யப்பட்டதாகவும் விஜய ராவ் கூறினார்.
“கைப்பற்றப்பட்ட இந்த போலி மதுபானத்தின் மதிப்பு சுமார் RM100,000 ஆகும், மேலும் அப்பொருட்கள் பகுப்பாய்வுக்காக வேதியியல் துறைக்கு அனுப்பப்பட்டன, இருப்பினும் கைப்பற்றப்பட்ட பொருட்களின் உண்மையான மதிப்பை ராயல் மலேசியன் சுங்கத் துறை (JKDM) கணக்கீடு செய்யும்.
“இந்த வளாகத்தில் போலி மதுபானம் வாங்குபவர்களில் பெரும்பாலானோர் வெளிநாட்டினர் என்பது விசாரணையில் கண்டறியப்பட்டது.
“சில விலையுயர்ந்த மதுபானங்கள் RM30 க்கு விற்கப்படுவதால், உள்ளூர்வாசிகளாலும் வாங்கப்படுகின்றன,” என்று அவர் கூறினார்.
இந்த போலி மதுபானம் தயாரித்து விற்கும் நடவடிக்கை, சுமார் இரண்டு ஆண்டுகளாக செயல்பட்டதாக விசாரணையின் முடிவுகளில் கண்டறியப்பட்டுள்ளது என்றார்.
சட்டவிரோத நடவடிக்கைகளில் ஈடுபட்டதாக சந்தேகிக்கப்படும் உள்ளூர் மற்றும் மியன்மார் நாட்டு பிரஜை ஆகிய இரு ஆண் சந்தேக நபர்களை போலீசார் தேடுகின்றனர்.
“சந்தேக நபர் 1967 சுங்கச் சட்டம் பிரிவு 135 (1) (d) மற்றும் குடிவரவுச் சட்டம் 1959/63 இன் 6 (1) (c) இன் படி மேலதிக விசாரணைக்காக எந்த அடையாள ஆவணமும் அவரிடம் இல்லாததால் 14 நாட்கள் விளக்கமறியலில் வைக்கப்பட்டார். ” என்று அவர் கூறினார்.
