கர்நாடக மாநிலம் சாம்ராஜ்நகர் மாவட்டத்தில் உள்ள தொடுப்பூரில் வசித்து வந்தவர் இளம் நடிகர் லோகேஷ். இவர் பல கன்னட படங்களில் நடித்து இருக்கிறார். சில தினங்களுக்கு முன்பு லோகேஷ் புதிய பைக் வாங்கினார். அதில் ரீல்ஸ் வீடியோ எடுத்து சமூக வலைதளப்பக்கத்தில் பகிர்ந்தார். பின்னர் தனது சொந்த ஊரான தொடுப்பூருக்கு பைக்கில் புறப்பட்டு சென்றார்.
மாண்டியா மாவட்டம் எலியூர் அருகே பைக் வந்தபோது விபத்துக்குள்ளாகி லோகேஷ் மரணம் அடைந்தார். சம்பவ இடத்தில் கை, கால்கள் துண்டாகி ரத்த வெள்ளத்தில் லோகேஷ் இறந்து கிடந்ததை பார்த்த அக்கம்பக்கத்தினர் போலீசுக்கு தகவல் தெரிவித்தனர். மாண்டியா புறநகர் போலீசார் விரைந்து வந்து பிணத்தை கைப்பற்றி விசாரணை நடத்தினர். விபத்து நடந்த இடத்தில் ஒரு காரின் வாகன பதிவு எண் பலகை கிடைத்து உள்ளது. இதன் மூலம் கார் மோதி அவர் பலியாகி இருக்கலாம் என்று போலீசார் சந்தேகித்து விசாரித்து வருகிறார்கள். இந்த சம்பவம் கன்னட திரையுலகில் சோகத்தை ஏற்படுத்தி உள்ளது.